Educación
O colexio de Leirado é galardoado por un proxecto da biblioteca
Toda a comunidade educativa participou na elaboración de “Mergúllate con nós: Descubre e aprende”
D. P.
O CEIP Plurilingüe de Leirado en Salvaterra de Miño vén de ser galardoado no IX Concurso de Traballos por Proxectos que foi convocado pola Dirección Xeral de Ordenación e Innovación Educativa no contexto do Plan LIA de Bibliotecas Escolares da Consellería de Cultura, Educación, Formación Profesional e Universidades.
O proxecto premiado foi “Mergúllate con nós: Descubre e aprende”, na modalidade de proxectos documentais integrados, coordinados dende a biblioteca escolar. Entre os criterios tidos en conta para a valoración do proxecto figura a participación de toda a comunidade educativa no seu desenvolvemento.
“Este premio supón, unha vez máis, o recoñecemento de que o deseño deste proxecto e os que se están a desenvolver no centro coloca ao seu alumnado no camiño axeitado para acadar a mellor competencia lectora e para acadar competencias que son clave na sociedade da información, nomeadamente a súa competencia para o uso e produción de información”, sinalan dende o propio colexio.
Parabéns, polo tanto, para o equipo da biblioteca, equipo docente, persoal non docente, alumnado, familias, ANPA e outras institucións que participaron no desenvolvemento do proxecto no pasado curso escolar (CFR de Vigo, Asesoría de Bibliotecas Escolares de Galicia, Inspección Educativa, Concello de Salvaterra de Miño,...).
Dende o centro esperan contar coa colaboración novamente de toda a comunidade educativa para o desenvolvemento de proxectos vindeiros.
- O Festival de Cans avanza os concertos da súa XXI edición
- Unha alumna de 1º da ESO leva Nigrán ao Congreso
- Brais Méndez e a ONG IGAXES únense para loitar contra o odio
- Gondomar, Baiona e Nigrán celebran a Festa da Bicicleta
- A parentalidade positiva estúdase a fondo no IES Val do Tea
- 200 ciclistas correrán a VIII “Challenge Rías Baixas”
- Máis de 25 artistas exporán a súa obra en Baiona
- A élite nacional do tenis de mesa brilla en Mos