Tui
Isabel Blanco lerá o pregón das festas patronais de San Telmo
Será o vindeiro sábado e marcará, xunto a Fillas de Cassandra o inicio dos actos que se prolongarán ata o luns 8 de abril
d. p.
As Festas de San Telmo reafirman o seu carácter de interese turístico galego coa transformación iniciada hai uns anos, e continúan coa potenciación dos valores locais. O programa festivo, que se vai desenvolver do sábado 30 de marzo ao luns 8 de abril, abrangue actividades para todas as idades cunha ampla oferta na que salienta a colaboración das distintas asociacións tudenses.
O pregón da actriz Isabel Blanco abrirá o programa festivo o sábado 30 ás 12.45 horas na praza da Inmaculada. Nesta primeira xornada celebrarase a IV Gala Premios Cidade de Tui no Teatro Municipal. Fillas de Cassandra encabezan o cartel musical deste ano co concerto que ofrecerán esa mesma xornada, á media noite, no Recinto Feiral. Previamente actuará Quinkillada e para pechar a noite contarase con Dj Amarok
Mondra actuará o domingo 7 no Espazo Feiral. Pero amais na programación figuran tamén concertos de The Turre’s Band, Manuel Madarnás, Pacheco Bros, Acevedos Delgados, La Timba Mullallo, Gin Tonic e D’Crooners Band,
O público infantil e familiar poderá gozar con “Os ourizos agarimosos”, Barafunda, Peter Punk,e O Show de Fifo.
O son das bandas de música Popular de Tui, Xuvenil de Tui, a Agrupación Musical do Rosal, a Unión de Guláns, e a Escola Naval Militar de Marín. As corais tudenses do Centro Sociocomunitario, Ponte das Febres e San Telmo actuarán no centro de día Amoralia e nas residencias Paz e Ben e San Telmo. Nas rúas de Tui non faltará a animación das charangas A Tu Ritmo e Cantos Somos, de Pulpiño Viascón, Troula, e na carpa da Corredoira actuará o alumnado e profesorado do Conservatorio Profesional de Música de Tui.
Non faltará a música tradicional co Festival Folclórico o domingo 31, pero tamén cos grupos Santa Columba de Ribadelouro, as bandas de gaitas “Arume” de Malvas, e “Lembranzas da Terra” de Guillarei.
As verbenas serán amenizadas por América, La Oca Band, Claxxon, Los Players, e actuará tamén Dj Enter.
Gastronomía
A gastronomía estará moi presente nas festas tanto pola Festa do Meixón, coma polo III Encontro de Viños da Raia que se desenvolverá o sábado 30 e o domingo 31, así coma polos postos gastronómicos a cargo de asociacións culturais tudenses que haberá no Recinto Feiral.
Cómpre salientar tamén un ano máis a exposición de Fotografía Antiga de Tui que recuperará imaxes que forman parten xa da nosa historia. Do luns 1 ao venres 5 o Teatro Municipal acollerá unha nova edición do Festival de Teatro Amador a cargo dos grupos locais CAI, Chirlomirlo, Aloia, San Fins e A Insua, que estrearán aquí as súas novas montaxes.
- O Festival de Cans avanza os concertos da súa XXI edición
- Arbo prepara unha LXIV Festa da Lamprea para toda a familia
- “O amor debe liberarse da racionalidade para ser auténtico”
- As festas de San Telmo resisten ao temporal cun éxito rotundo
- A élite nacional do tenis de mesa brilla en Mos
- A cativada nigranesa aprende orientación
- As Músicas no Miño volven do 12 ao 15 de setembro
- O epicentro do atletismo comarcal está no Porriño