Catro familias de Baiona acollen nenos saharauís

Un total de catro familias baionesas participan no programa Vacacións en Paz. O alcalde de Baiona, Jesús Vázquez Almuíña, reafirmou o compromiso do Concello con este proxecto durante a recepción dos nenos e nenas saharauís participantes no mesmo.

Este programa de acollida familiar temporal pon a énfase en catro aspectos fundamentais, o educativo, o sanitario, o social e o lúdico.

O rexedor destacou que Baiona “é unha localidade solidaria” e agradeceu a todas as familias que, “verán tras verán, acollen a nenos e nenas saharauís procedentes dos campamentos de refuxiados de Tinduf, para axudarlles e garantirlles un verán en paz”.

Ao acto asistiron tamén outros concelleiros da corporación municipal e os nenos e nenas saharauís coas súas respectivas familias de acollida.