Muiñeira, tango, rock, punk

Loita Amada:velaí o novo proxecto musical de Jasper, o que fora lider, compositor principal e vocalista dos recentemente disoltos Nao. Jasper, dono xa dun importante e grande percorrido na escena galega mediante grupos como Xenreira, A Matraca Perversa ou MDR, vén xuntarse agora coa pandereteira Nébeda Piñeiro artellando e dando forma e vida a un proxecto que bebe de moitos estilos e sonoridades mentres arreda da etiquetaxe doada. Unha tarefa adobiada cun estilo achegado e perfectamente trazado arredor do xénero da canción protesta, da nova poesía galega e tamén dos universos máis intimistas e existenciais que xa deixara ver en moitos dos temas dos Nao.

Xa que logo, e baixo o título de Viva a loita amada revolucionaria!, preséntanos neste disco debut un conxunto de dez cancións que van, veñen e transcorren dende o carácter máis combativo e social até os terreos máis sensibles e persoais, falándonos de amor, de respecto pola nosa propia memoria e tamén da memoria dos nosos devanceiros e aínda incorporando cancións que falan de diaños interiores, de rebeldía, de resistencia, de loita pola dignidade, pola liberdade e que, sobre todo, son e supoñen un canto á esperanza. Cantigas nas que se mestura estilos que van dende a muiñeira ao vals, o tango, a música popular, mesmo a xota, e por suposto que o rock, o punk ou o pop. Porque Loita Amada nace como un proxecto directo e sen marxe á indiferencia, un xeito que presenta cada peza absolutamente alonxada de calquera idea que non recaia no propio peso e concepto de cada canción, unha a unha, por separado e en singular, conferíndolle, iso si, a coherencia precisa para que cada tema veña tirar do outro nunha escoita que explica ás mil marabillas todo o carácter do álbum.

Co traballo na produción e nos arranxos de Paco Montoto e Lolo Arincón dende a disqueira Xonix Records da Bandeira, Jasper e Nébeda fálannos da vida, da fraxilidade existencial e tamén da forza persoal, social e colectiva que poden facer do mundo un lugar mellor, máis habitable e máis xusto e, por suposto que, coa música como ferramente imprescindible e alentadora arreo. Agora, Jasper e Nébeda -quer dicir, Loita Amada- prometen unha xira que abofé que os levará polos mellores escenarios do país onde poderemos gozar nas distancias curtas dunha banda que chega para quedar e para, sen dúbida, vir converterse nun dos nomes de referencia da nosa escena para os anos vindeiros.

De momento, anuncian xa a presentación do proxecto deste Viva a loita amada revolucionaria! o vindeiro sábado 25 de febreiro na sala Capitol en Compostela, nun directo que -iso prometen- ha de durar case dúas horas, coa presentación de banda incluída, e contando cos músicos Iván Barreiro ( guitarra), Iria Iglesias (teclado), Kinhos Saburido (percusión), Iván Bernárdez (baixo), María Prado (trompeta) e Xiana Naval (trombón). Tamén prometen para este día numerosas colaboracións con nomes propios da nosa escena e achegados ao universo musical do grupo como Tanxugueiras, Mini e Navia Rivas, Lolo Arincón e Paco Montoto de Xonix Records, Patty Castro, Agrupación Lina e Lola e algunha sorpresa máis que ese día coñeceremos.

Suscríbete para seguir leyendo