“Onstopus é como a voz dos illáns e aos organismos oficiais interésalles coñecela”
O minixornal naceu como un entretemento na pandemia e acaba de chegar aos 80 números
Celestino Pardellas de Blas, máis coñecido como “Tinón”, é profesor xubilado, presidente de PineirÓns e leva máis de medio século vencellado á illa de Ons. Ao seu traballo na asociación, que cada ano edita a revista Aunios, súmalle desde o ano 2020 a elaboración dun minixornal denominado Onstopus. É un repaso sobre a realidade da illa, anécdotas, historias ou necesidades, combinando o humor coa seriedade. Este minixornal illán acaba de acadar o seu número 80. Non está nada mal!
–Como xurdiu a idea de elaborar este boletín “anárquico-independente” de Ons, tal como o define na súa cabeceira?
–A idea vén de fai xa unha boa cantidade de anos, cando nos xuntabamos en Ons varios visitantes asiduos e, nas nosas conversas, a carón de temáticas varias, sobre todo, culturais, comentábamos sucesos que ocorrían na Illa. Dixeramos de facer un pequeno boletín coas anécdotas que ían ocorrendo e ata lle tiñamos nome “A voz do Cucorno”. Aínda que se intentou, non foi arriba. No 2020 coa problemática da pandemia e ao estar pechado na casa, ocorréuseme sacar esa idea adiante e, paseniñamente, foi enganchándome, e xa van case polos 80 números de Onstopus.
Nun principio a idea era ir sacando a razón un boletín cada quince ou vinte días ata rematar a pandemia ou se me pasara a lideira. Pero, a medida que ían saíndo e vía a enorme aceptación que tiña e como influía en xestores, veciños e persoas interesadas nesta Illa, funme animando e agora está considerada coma unha fonte de noticias interesantes sobre Ons
–Con que obxectivo comezou a súa elaboración e difusión?
–O obxectivo inicial foi matar o tempo con algo que me apaixona, a Illa de Ons. Contar acontecementos, anécdotas, reivindicacións... sobre ela como se fose un pequeno periódico.
–Cales son os temas que lle interesa tratar e con que tono?
–A temática é moi variada onde o humor e dar a coñecer as problemáticas de Ons nun ton serio, sobre todo, no referente ás cuestións sociais, urbanísticas, culturais... Tentando dar as miñas suxestións baseadas na experiencia de case 50 anos vinculado a esta Illa recompilando todo tipo de datos sobre as súas peculiaridades.
–Os contidos elabóraos vostede en solitario ou conta con colaboradores dispostos a botar unha man?
–A totalidade do contido é cousa miña, agás cando me mandan suxestións que, se coido que poden ser interesantes para o lector, as incorporo e comento.
–Acaba de chegar ao seu número 80. Cando empezou a elaborar esta peculiar visión sobre a illa agardaba chegar tan lonxe?
–Esta andaina comezou en abril de 2020. Nun principio a idea era ir sacando a razón un boletín cada quince ou vinte días ata rematar a pandemia ou se me pasara a lideira. Pero, a medida que ían saíndo e vía a enorme aceptación que tiña e como influía en xestores, veciños e persoas interesadas nesta Illa, funme animando e agora está considerada coma unha fonte de noticias interesantes sobre Ons, cunha importante aportación de ideas, sobre todo socio-culturais, que está a enganchar a moita xente. Comentaba un lector: “Grazas á lectura de Onstopus, coñecín a verdadeira Ons, cando volvamos, a percorreremos e miraremos doutro xeito”.
–Na súa lista de destinatarios sei que hai organismos oficiais vencellados á Ons. Como acollen ou se toman os contidos do Onstopus?
–Envíono a todos os meus contactos, a persoas que están vinculadas dalgún xeito coa illa, aos organismos xestores de Ons (Consellería de Medio Ambiente e Parques), a organismos que dalgún xeito poden facer moito pola Illa (Consellería de Cultura, Xuventude, Deputación e Concello de Bueu). Tamén a un bo número de museos, bibliotecas, casas de cultura... E a todos os que participan na elaboración, distribución e posta en valor da revista cultural “Aunios”. Á vez, moitos dos lectores a reenvían aos seus contactos [está en internet na páxina: http://bueu.esy.es/Revistas/Onstopus/indice.htm e http://bueu.esy.es/Revistas/Onstopus/onstopus.htm]. Ten unha moi boa acollida, segundo os correos que me envían felicitándome ou comentando o relatado en cada unha. Coido que dende os organismos oficiais que a reciben, interesa saber a opinión da xente, coñecen o meu vínculo coa veciñanza e este minixornal pode considerarse a voz dos veciños, e por iso interésalles coñecelo.
A carón do humor, intento dar suxestións e, ás veces, comentar, cunha crítica construtiva, accións que considero deben ser tratadas e solucionadas polos xestores e veciños. Sería moi arrogante o dicir que si conseguín mellorar a situación da illa e veciños
–Pensa que a difusión do boletín conseguiu dalgunha maneira mellorar a situación na illa e contribuír a que se faga caso a algunhas das reclamacións e reivindicacións dos illáns?
–Como dixen, a carón do humor, intento dar suxestións e, ás veces, comentar, cunha crítica construtiva, accións que considero deben ser tratadas e solucionadas polos xestores e veciños. Sería moi arrogante o dicir que si conseguín mellorar a situación da illa e veciños. Sen embargo, moitas das ideas, suxestións e reivindicacións expostas no minixornal, foron saíndo adiante posteriormente, mellorándose en moitos casos as accións a realizar pola administración e arranxándose cuestións importantes para a veciñanza e visitantes.
–Que temas ten pensado para os seguintes números?
–Seguirei co humor, fotografías antigas, reivindicando temáticas como charlas aos veciños para a mellor utilización de materiais de limpeza e temática do lixo; programación de actividades antes do verán e presentalas publicamente para que os visitantes programen á súa vez a visita con antelación; arranxo de camiños; posto de primeiros auxilios; bandeira azul, sendeiro e centro azul para algunha praia, ruta e o centro de visitantes; que o faro, agora automatizado, convírtase nun importante centro cultural. Ou que as axudas para investigación abrangan máis que a área de influencia do parque nacional. Ou reforestación, máis investigación etnográfica... E que o Concello de Bueu se involucre máis coa illa, que pertence ao seu municipio.
–Na cabeceira do minixornal pon que o seu prezo de venda é unha “cunca de albariño caseiro”. A cantas cuncas o invitaron xa?
–Difícil de cuantificar! Coido que xa levo varias colleitas “vendimadas” [risos].
Suscríbete para seguir leyendo
- Dos heridos en un choque entre dos coches con niños a bordo en la Autovía do Morrazo
- Un vecino de Cangas muere en un grave accidente de tráfico en la Autovía do Morrazo
- La Policía ya tiene su informe de competencias en vías locales y no podrá sancionar en Cabo Home
- La Bonoloto 'bendice' a un vecino de Cangas con 40.000 euros
- Un choque frontal en el Corredor se salda con dos conductores heridos graves y dos menores ilesos
- La Xunta interviene Ambulancias del Atlántico y la plantilla irá a la huelga si no cobra el día 1
- Una placa recordará a Sonia Cordeiro y su simbolismo frente a la transfobia
- El monte comunal de Moaña lleva 7 meses con las pistas destrozadas y troncos en riesgo de desplome