En defensa das pulgas da Praia

Lin días atrás asinada por una señora residente en Nigrán unha carta ao director na que se alegaba en defensa das pulgas da praia. Lamento non poder citar o nome da autora porque o vento me levou da man o papel no que o tiña anotado. En troques, lembro moi ben os seus brillantes razoamentos. As pulgas da area son uns crustáceos diminutos e inofensivos que se alimentan, nas praias de restos orgánicos. O concello de Nigrán, e estou seguro de que tamén outros das rías, ten a obsesión de achandar as praias con maquinaria pesada, que deixa o areal gradado a fondo. Levan da Praia todo o argazo que alí deitou o mar, e con el as diversas pulgas saltadoras. Co argazo e co remover da area masacran non só as pulgas, senón tamén varias especies de dípteros e outra animalia que non lle fai mal a ninguén.

Di a autora da carta que unha praia é para estarmos na Natureza, cos seus cheiros e en compaña dos seus seres vivor e tamén mortos. Considera que unha Praia non é unha piscina e, engado eu, que o que queira asepsia e comodidades que vaia dar co seu corpo nun spa. É triste comprobar como a extraordinaria sensibilidade ecolóxica, patriótica e social que move masas solidarias cando a costa aparece contaminada dalgunha maneira, en Galicia, non se manifesta no caso da maquinaria municipal que destrúe cada día, co motivo de pentear as praias, un rico e complexo espazo ecolóxico.

A pulguiña das praias, coido que Talitrus saltator, divirtiunos moito de nenos e é a parte máis visíbel da destrucción da vida nas nosas praias. O carromeiro, o verdello, as correolas a argaceira toda constitúe un festín para moitos insectos, vermes e crustáceos coma a pulga que, á súa vez, atrae bandos de paxarada, incluídos os periquitos invasores de Toralla, que veñen e aquí e de acolá a participaren do festín varado.

Hai amantes da natureza que só teñen ollos para o orangutango, para o elefante ou para a balea. A medida en que os animais se fan pequenos, perden interese e ningunén se moviliza para protexer os íntimos. Eu afiliaríame a unha organización para a defensa das pulguiñas da praia. En realidade, non penso que haxa moitas persoas dispostas a se uniren contra o maltrato municipal ás praias da ría de Vigo e a favor da biodiversidade da que tanto se fala en van. Pero tamén sei que existen, tal como revela a carta ao director coa que iniciaba eu esta columna.