As Danzas Brancas de Prado da Canda, vivas desde 1800

As Danzas Brancas aparecen rexistradas no libro da confraría da Virxe do Rosario xa no ano 1800. “Este antigo libro que se atopa na igrexa recolle xa nese ano e entre outros moitos datos, o gasto das festas, entre eles, o das danzas” así o explica Mauricio Lamosa Blanco, membro do grupo de Danzas Brancas de Prado da Canda.

As Danzas Brancas foron pasando de xeración en xeración ata os nosos días, de nais e pais, de avós e avoas a fillos e fillas. Así foi no caso de Mauricio que as herdou da súa avoa e do seu avó, xa que os pais emigraran e non tiveran ocasión de practicalas.” “É unha danza que foi pasando de xeración en xeneración e é o único sitio do concello que as conserva, Posiblemente houbo nalgunha parroquia máis pero foise erdendo por diversos motivos”.

O pasado domingo e na honra da Virxe do Rosario, catro homes e catro mulleres danzaron na saída e na entrada da procesión. “As dúas danzas acompañan á virxe na procesion cando sae e cando se recolle. A primeira coreografía consiste en reverencias e cruces para a Virxe e a outra é unha xota balseada, composta de catro mulleres, catro homes e unha guía que pauta a coreografía ata configurar unha figuras”.

Segundo relata Mauricio, os traxes foron mudando ao longo dos tempos e nese libro da confraría parece que indicaba que se bailaba con turbantes non podendo concretar como eran ao non dispor de máis datos. “Algunhas persoas da parroquia fan referencias a adobíos con plumas e/ou flores. Agora non levamos nada diso porque non puidemos documentalo máis que verbalmente ao non haber fotografías”.

Mauricio Lamosa Blanco leva 35 anos bailando e xunto a guía do grupo, Lorena, e ao resto dos bailaríns, Adrián, Antonio, Natalia, Norberto, Tania e Sandra e Natalia recuperan cada ano a nosa tradición para que non se perda.