Nigrán pregunta “E ti, de quen ves sendo?”

“Porque xuntos venceremos esta crise. Porque somos veciños. Porque cando todo isto pase seguiremos mantendo as rúas con vida. Porque axudas as persoas emprendedoras e xeras emprego. Porque a riqueza se queda no pobo. Porque evitas maiores desprazamentos e resulta ecolóxico. Porque aínda que agora o tape a máscara, sempre temos un sorriso de agradecemento. Porque ti nos importas”. Son algúns dos argumentos, simples pero contundentes, que os comerciantes de Nigrán ofrecen nunha nova campaña de dinamización e aposta polo comercio de proximidade.

O Concello, xunto a Asociación de Empresarios Ovalmi, vén de lanzar a campaña de promoción do comercio local ‘Eu son de mercar en Nigrán. E ti de quen ves sendo?’ que dá continuidade ao hashtag iniciado no Nadal #VivoEnNigránComproEnNigrán. A iniciativa municipal sitúa novamente como protagonistas aos propios comerciantes do municipio, seleccionando como imaxes de todos os carteis e como testemuñas dos vídeos que se irán estreando paulatinamente a máis dunha vintena deles de diferentes parroquias e sectores, dende unha peixería, a un centro de estética, tendas de roupa, establecementos hostaleiros, bazares, un taller de rodas ou unha mercería.

O Concello de Nigrán continúa así co seu esforzo para incentivar o comercio de proximidade entre a veciñanza, tal e como xa o fixo durante o Nadal ou anteriormente no confinamento coas pequenas tendas de alimentación, as panaderías en Pascua ou o Día da Nai. Nesta ocasión adoita un cariz máis informal e divertido mediante o propio deseño, os posados dos protagonistas e a propia pregunta popular ‘E ti de quen ves sendo?’ coa súa agardada resposta ‘Eu son de mercar en Nigrán’ e o recordatorio “Cando mercas local enriqueces ao teu pobo e axudas aos teus veciños”.

A campaña inclúe difusión publicitaria e en redes sociais, regalo de 8.000 bolsas e carteis entre o pequeno comercio, vinilos para escaparates, adhesivos e oito vídeos. Terá continuidade no tempo, polo que desde o Concello animan a todos aqueles comerciantes interesados en participar coa súa imaxe a escribir a comunicacion@nigran.org co fin de ser eles os próximos protagonistas.