Intuímos que, hai uns 2.000 anos, na Idade do Ferro, o curro do Coto da Roda se subordinaba ao castro das Cercas, do mesmo xeito que a Roda da Ameixoada se supeditaba, quizais, ao castro de Vilar (Figueiroa), situado a outros 1.000 m de distancia cara ao noroeste. O Coto da Roda afástase 200 m do río Lérez e a Roda da Ameixoada, 100 m da mesma corrente de auga, indispensábel para a mantenza dos animais.
Sexa como for, é significativa a abundancia de restos arqueolóxicos de natureza habitacional en ambas as dúas marxes do río Lérez de Cerdedo, de norte a sur: o Coto da Roda (dereita), o Castro das Cercas (esquerda), o castro do Pego (dereita), a Roda da Ameixoada (dereita)..., cubrindo un retorto treito fluvial de apenas 6 quilómetros de lonxitude.
