Sinerxías educativas nos colexios de Soutomaior

As actividades formativas englobadas no programa de accións “Sinerxías Educativas” promovidas polo Concello de Soutomaior deron comezo nos centros educativos do municipio, prologándose durante todo este mes de abril, maio e xuño.

As accións pretenden achegar á mocidade recursos en relación a diferentes áreas e contidos co fin de proporcionar ferramentas que apoien, por unha banda, a labor educativa dos centros e, por outra, o desenvolvemento integral das persoas fundamentalmente no que respecta aos temas de maior interese para cada etapa educativa. Son accións que mesturan metodoloxías convencionais e outras máis disruptivas cuxa labor é a prevención no eido, por exemplo: de hábitos e conductas de risco, nas adiccións, no desenvolvemento emocional e nas habilidades sociais básicas, na educación en valores e na xestión de conflitos, na conformación da cidadanía e identidade dixital, nas relacións afectivo sexuais, etc. Tamén son accións enfocadas á toma de decisións poñendo en valor a información e a selección como elementos referentes á hora de abordar calquera proceso que implique ter que optar e polo tanto asumir as consecuencias do que decidimos.

Por outra banda, inclúense accións de sensibilización e educación medio ambiental e ponse énfase tamén na capacidade creativa como motor para a aprendizaxe e catalizador da implicación.