“Abonda con vivir”, último libro que lanza Xerais sobre a biografía de Luísa Villalta

Luísa Villalta, poeta homenaxeada no Día das Letras Galegas deste ano, centra a temática de catro libros publicados por Xerais.

Dende o pasado mes de decembro están xa nas librarías os títulos Luísa Villalta. Melodía de palabras e Luísa Villalta. Alma de violino, pensados para que os máis pequenos coñezan a súa obra.

No primeiro, María Canosa relata a biografía da poeta coruñesa para chegar ao público máis novo, xa que está dirixido a nenos e nenas a partir dos 11 anos. Publícase na colección Merlín e inclúe imaxes da poeta e violinista.

No segundo, Eli Ríos, Beatriz Maceda e a ilustradora Laura Suárez uniron o seu traballo para crear un álbum ilustrado co que descubrir a Luísa Villalta a partir das palabras. Partindo de termos que definen a poeta, achega algunhas claves para coñecer a súa traxectoria como música e poeta comprometida.

Xa en xaneiro publicouse Somos un pobo de artistas. O método Luísa Villalta, de Xurxo Souto, que explica o vínculo entre a poesía e a música a partir da formulación da propia homenaxeada. Por último, dende hoxe estará á venda Abonda con vivir, unha biografía feita con retallos da memoria que gardaron de Luísa Villalta persoas que formaron parte da súa rede afectiva e que asina a xornalista Montse Dopico. Trátase dunha análise literaria, sociolóxica e histórica que percorre todas as mulleres que foi Villalta.