Carmela Silva, a Feijóo "Menos chorar por Galicia e máis facer pola provincia de Pontevedra"

E é que Carmela Silva considera que "é inexplicable que se teñan investidos tantos recursos no Corredor do Morrazo e que se sigan tendo as mesmas retencións de antes".

Esta fin de semana, miles de coches quedaron atrapados nesta autovía, polo que a presidenta pediu explicacións, xa que entende que "algo non se debe estar a facer ben" e urxiu a que os responsables da Xunta "se poñan a iso".

A presidenta da Deputación destacou que están "a traballar moitísimo para que cada día haxa máis visitantes" que vaian á provincia, á vez que sinalou que as retencións son "insoportables" e "enfadan moitísimo" á xente autóctona e tamén aos turistas, "que se van cunha imaxe que non é a que queremos trasladar de excelencia".

"Non podemos falar de excelencia na prestación de todos os servizos se as nosas infraestruturas non son as que ten que ter unha provincia no século XXI", declarou.

Neste sentido, Carmela Silva lembrou que o presidente da Xunta "veu con bombo e prato a inaugurar unha obra que non estaba rematada". "Pois agora que dea explicacións", espetou.

Vía rápida do Salnés

No caso da vía rápida do Salnés, a presidenta provincial esixiu que se acometa o proxecto de desdobramento desta estrada. Un proxecto que en 2012 se chegou a expor ao público pero que se paralizou despois da publicación dun informe emitido en 2015 pola Dirección Xeral de Conservación dá Natureza que advertía de que o deseño do viario afectaba ao Rego dos Mouros que desemboca no complexo intermareal Umia-O Grove, un espazo integrado na Rede Natura.

"Que non veñan con chistes de que hai problemas de carácter ambiental", declarou Carmela Silva co convencemento de que "no século XXI a humanidade ten coñecementos máis que sobrados para tomar decisións que permitan construír infraestruturas respectando o medio ambiente".

A mandataria pontevedresa tamén criticou que a Xunta, "sen consultar con ninguén", instalase un semáforo nas Salinas para que os peóns crucen a PO-308, o que agravou o problema dos atascos montando "un caos tremendo" no acceso ao Grove. Por tanto, "menos bromas e que se tomen xa decisións inmediatas", dixo.

Finalmente, Carmela Silva dirixiuse ao presidente do Executivo galego para recomendarlle que "menos esixir a un goberno que non leva nin cen días todo o que non fixo Rajoy, e máis tomar decisións" para Galicia.

"Menos chorar por Galicia e máis facer pola provincia de Pontevedra", díxolle a Feijóo. "Con choros e bágoas non se arranxa nada", afirmou, para despois engadir que as cousas "se arranxan con decisións, recursos e proxectos": "Así que que se poña a iso xa, de forma inmediata".