25 de octubre de 2019
25.10.2019

Antonio Piñeiro gaña o IV Premio Xosé Neira Vilas de Novela Curta coa obra 'Esca'

Recibirá o galardón o 3 de novembro en Gres

25.10.2019 | 02:38

Esca, de Antonio Piñeiro, é a obra gañadora do IV Premio Xosé Neira Vilas de Novela Curta. Foi decisión unánime do xurado, reunido onte á tarde no compostelán Pazo de San Roque e formado por Juan Andrés Fernández, Rosalía Morlán, Pilar Sampedro e Fernando Redondo -por parte da Fundación Xosé Neira Vilas- e mailo crítico literario e profesor universitario Armando Requeixo.

O tribunal ensalza a calidade dun relato que evoluciona en espiral creando unha atmósfera e un clima de tensión narrativa, amais de destacar pola súa ambición estética, prosa lírica e riqueza léxica, pola creación de personaxes poderosos e ben caracterizados e, en definitiva, por compoñer un relato aberto a diversas interpretacións cun final impactante e iluminador. Tamén subliña a alta participación nesta cuarta edición, que acadou os trece orixinais presentados, a máis alta dende que se creou o premio.

Antonio Piñeiro Fernández é un profesor, editor e escritor nado en Ribeira; atesoura os premios Torrente Ballester e García Barros; e entre as súas obras están A identidade fascinada, As fiandeiras ou A través do fume. O galardón seralle entregado o domingo 3 de novembro nun acto público na sede da Fundación en Gres (Vila de Cruces) co gallo da conmemoración do Día de Neira Vilas. O certame, dotado con 1.000 euros e a publicación do traballo seleccionado, persegue estimular a creación literaria, fomentar a lectura en galego e proporcionar obras de calidade aos xóvenes que lle permitan achegarse ao mundo da novela.

Anisia e encontro

Por outra banda, este domingo, 27 de outubro, ás 17:00 horas, celebrarase unha homenaxe a Anisia Miranda, xornalista, escritora e muller de Neira Vilas, con motivo do décimo aniversario do seu pasamento no cemiterio de Gres (Vila de Cruces). O acto consistirá nunha ofrenda floral, a lectura dalgúns dos seus textos e unha lembranza da súa figura. A continuación, terá lugar un coloquio co escritor Xián Lois Alcayde, gañador do I Concurso Balbino de Relatos, que arranca os Encontros Literarios en Gres. Este ciclo traerá autores mozos para falar da súa obra, dos seus procesos creativos e da pegada da obra de Neira Vilas na súa escrita.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia