A mellor poesía improvisada
Un centenar de alumnos de todos os centros da comarca compiten hoxe no certame de regueifas
Dende comezos de abril todos os alumnos de 2º de ESO dos institutos e colexios da comarca se formaron e competiron no eido da poesía improvisada, grazas aos obradoiros impartidos por Luís Caruncho e Pinto d´Herbón. Hoxe un centenar de mozos de Bueu, Cangas e Moaña compiten no Auditorio cangués para amosar as súas capacidades de improvisación e a súa soltura na lingua galega. Desta cita sairán os mellores estudantes do Morrazo na arte da regueifa, unha disciplina tradicional galega con orixe nos casamentos e que volve a poñerse de moda por tratarse dunha variante propia das coñecidas "pelexas de galos" do rap.
Os 10 mellores alumnos de cada centro participarán no certame desta mañá, e entre o público estarán presentes os 400 que participaron nos obradoiros e que quedaron eliminados nas fases anteriores.
As probas de hoxe constarán de dúas partes, en grupos e mesturados por centros. Á segunda parte chegarán só os 20 mellores dese centenar. Terán que solventar probas como improvisar sobre palabras que lles vaian dando ou darlle continuidade a frases.
Os propios Luís Caruncho e Pinto d´Herbón se encargarán de dirixir a proba. O xurado estará formado por referentes da música tradicional do Morrazo como o mestre gaiteiro Xavier Blanco, Pili Gonçalves, Guillerme Ignacio e Sara Malvido da Banda de Gaitas Tromentelo.
O instituto que logre meter a máis alumnos na ronda final levará unha rosca de pan como premio.
Co obxectivo de que os xóvenes empreguen a lingua propia de xeito natural e a vinculen a actividades lúdicas mellorando a súa expresión nace este certame, no que colaboraron as concellerías de Normalización dos tres concellos da comarca. No primeiro dos obradoiros os alumnos recibiron incluso explicacións teóricas sobre a orixe das regueifas. A poesía en galego e a axilidade mental serán as raíñas da mañá de hoxe entre os estudantes da zona.
Temas
Más en Morrazo
-
Construyen el primer "hatchery" de molusco en la ría de Aldán promovido por el empresario de Narom
-
Gobierno y AV llegan a acuerdos que se plasmarán en el borrador de presupuestos
-
O Morrazo llega al Primero de Mayo con 30.104 cotizantes y una dependencia del turismo al alza
-
La promoción de As Lagoas firma el acta de replanteo con más de la mitad de los pisos ya vendidos