O Premio Narf, que concede a Deputación da Coruña, volve viaxar ao sur, e de novo para galardoar a un trío acústico. Se o ano pasado gañaron os vigueses Caldo, este ano leva o prestixioso recoñecemento a banda olívico-pontevedresa Peña. Os outros finalistas eran Elba, Sleepy Spice, Tandub e Secho.
A final do concurso Fran Pérez 'Narf', en homenaxe ao músico silledense falecido hai cinco anos, tivo lugar onte no Teatro Colón da Coruña coas actuacións ao vivo dos candidatos. O xurado — formado por Xurxo Couto, deputado de Cultura da Deputación da Coruña, como presidente; ademais da cantante Uxía, os xornalistas Carlos Crespo, María Yáñez e Teresa Cuíñas, e o crítico musical Pepe Cunha— apostou por premiar a Peña, un trío que en directo suma emotividade e impecable execución técnica. Os seus membros son Toño Magariños (voz e guitarra), Rubén Abad (guitarra e voz) e Elevana Vázquez (violín e coros).
O galardón ten o obxectivo de difundir, apoiar e promocionar os grupos e artistas musicais das diferentes comarcas e localidades galegas, así como lembrar e difundir socialmente a figura e a o obra do músico e compositor Fran Pérez 'Narf'. Algunhas das bandas gañadoras deste premio son Mounqup, Su Garrido Pombo, Bala, Caldo ou Familia Caamagno, entre outros.
