Cultura Galicia
Galicia, terra de premios nacionais
Marilar Aleixandre fíxose co galardón estatal á mellor novela; Ismael Ramos co do mellor poemario de autor novo e Ofelia Rey, o de Historia de España. Ledicia Costas logrou o seu terceiro Lazarillo
Galicia consolidouse neste exercicio como terra de premios nacionais, os galardóns que outorga o Ministerio de Cultura. Nesta edición, resultaron gañadoras Marilar Aleixandre (novela), Ismael Ramos (poesía nova) e Ofelia Rey (historia de España).
No caso de Aleixandre, venceu con As malas mulleres (Galaxia), unha novela histórica sobre a situación das mulleres do século XIX nos cárceres con atención á sororidade, á ollada de esperanza e á resiliencia.
O libro presta atención ás encarceadas na prisión coruñesa de A Galera que Concepción Arenal visitou entre 1863 e 1865 co gallo de descubrir algo sobre un tema varrido, do que case non queda constancia en documentos.
Pola súa parte, Ismael Ramos conseguiu o Nacional de Poesía Joven para Lixeiro (Xerais). No poemario, fala da fraxilidade, da amizade, de estar no presente e ser conscientes deste tempo, o máis precario de todos, segundo o seu punto de vista.
Desde a experiencia persoal, o poeta galego introduce tamén as relacións humanas mentres critica como o mundo laboral, lonxe de facernos libres, deshumanizounos.
No caso de Ofelia Rey, o libro premiado en Historia de España foi El vuelo corto. Mujeres y migraciones en la Edad Moderna, editado pola Universidade de Santiago de Compostela.
A obra ofrece unha investigación rigorosa con multitude de fontes históricas para ofrecer as causas e consecuencias das migracións das mulleres na Idade Moderna, tanto as realizadas na Península Ibérica como cara alén do Atlántico.
Os premios nacionais deste ano deixaron un fito sobranceiro porque incluíron o recoñecemento de dúas obras escritas en galego: Lixeiro, de Ramos; e Malas mulleres, de Marilar Aleixandre.
Desde o ano 2015, un total de dez obras escritas en galego lograron a distinción do Ministerio de Cultura nos eidos de poesía, narrativa, literatura infantil e xuvenil e ensaio.
A cifra non é desdeñable se temos en conta de que falamos dunha lingua minoritaria e minorizada, o galego.
Os éxitos colleitados este ano volveron a propoñer a cuestión de se estamos ante a época dourada da poesía galega. Non hai resposta única ao respecto. Por un lado, hai unha opinión xeralizada de que a poesía actual galega é dunha excelente calidade, o que non implica que sexa mellor ca de outros tempos.
O que é indubidable é que hai unha maior compresión e interese pola produción realizada nas linguas cooficiais nos distintos xurados dos premios nacionais que atenden á periferia.
Pero estes galardóns non foron os únicos de carácter estatal que se fixaron no traballo dos escritores e escritoras galegas. O xurado do Premio Lazarillo volveu premiar por terceira vez unha obra da viguesa Ledicia Costas: A lebre mecánica.
Desta volta, a autora presentou unha historia sobre un grupo de rapazas e rapaces de instituto que verán como a ludopatía e a falta de comunicación loitan contra a unidade, o amor, a amizade e a familia.
Relataba a propia Costas que o que pretendía era seguir o ronsel nesta obra de novelas que lle gustaban de moza como Rebeldes ou La ley de la calle.
Por último, días atrás, recibían a Medalla de Oro al Mérito en Bellas Artes do Goberno de España dous galegos: o escritor Manuel Rivas e o produtor musical Jesús López.
- Muere Itxaso Mardones, reportera de Gloria Serra en 'Equipo de investigación', a los 45 años
- El chalet de Vigo en el que vivía un jugador del Celta esquiva la piqueta
- Telecinco cancela 'Supervivientes' por esta razón: el programa que lo sustituirá a partir de ahora
- Tres detenidos por el robo de 300.000 euros en un banco de la Gran Vía de Vigo
- Aena se pronuncia tras el altercado de Piqué y Clara Chía en el aeropuerto de Madrid
- El Parlamento reclama que se suprima la obligación de registrar los gallineros de autoconsumo
- Detenidos en Tailandia dos periodista de Mediaset encargados de cubrir el juicio contra Daniel Sancho
- Caen dos históricos atracadores por el asalto bancario del botín de 300.000 euros de Gran Vía