A serie documental de TVG sobre cultura mariñeira "Pescadores de historias", producida por Producións Celtas e dirixida e presentada por X. H. Rivadulla Corcón, achégase hoxe (15.30 horas) ao porto coruñés de Corme.
"Corme desafiando o mar" mostra este mar de percebeiros que souberon universalizar a Pedra do Roncudo e o seu percebe. Corme é tamén mar de pescadores e de navegantes, un dos portos galegos dos que se ten noticia de actividade dende tempos máis antigos, e na primeira metade do século pasado foi dos portos comerciais de maior actividade de Galicia. Hoxe os homes e mulleres de Corme seguen fieis ao seu mar, resistindo, como a patroa maior, Mari Carmen Suárez, e o percebeiro Roberto Vidal.
