Un mes. Iso é o que durou o mural feminista pintado na Gran Vía de Vigo ata que recibiu o seu primeiro ataque. A Marcha Mundial das Mulleres Galiza, que impulsou a iniciativa xunta á BatukadaFeminista Tamborililas, denunciou esta tarde que durante a pasada madrugada alguén boicoteu o graffiti, no que aparecen sete pioneiras galegas do feminismo. "Stop feminazis", escribiron ao caron das facianas destas mulleres.
"Condeamos a misoxinia, machismo e fascismo deste ataque. Tinguiremos todos os muros de lilás porque o feminismo non para até que todas sexamos libres!", declarou nas súas redes a Marcha Mundial das Mulleres Galiza.
Estas son as sete mulleres inmortalizadas, unha pequena mostra de todas aquelas que dedicaron a súa vida a derrubar a sociedade patriarcal:
-Carmen González "A Picona": nada en Aldán en 1906, foi curandeira e facilitadora do aborto nun momento no que esta práctica foi criminalizada e podería levar a prisión.
-Rosario Hernádez "La Calesa": veciña de Vigo, vendedora de xornais de 16 anos e socialista, en setembro de 1936 foi detida, torturada e asasinada nun cuartel de Falange.
-Urania Mella: filla do pensador anarquista Ricardo Mella e Esperanza Serrano, foi presidenta da Unión de Mulleres Antifascistas de Vigo. Mestra de piano, ensinou a ler ás mulleres do barrio de Lavadores. Condenada a morte polos fascistas, pasou nove anos en prisión durante a ditadura.
-Saladina: muller trans represaliada polo réxime franquista e obrigada a vivir nas marxes das marxes da sociedade, esta viguesa foi unha das primeiras en manifestar a realidade LGTBI en Galicia a pesar dos golpes, feridas de arma branca, cárcere, explotación sexual e rexeitamento social.
-Corona González Santos: filántropa e pioneira da fotografía en Galicia. Autodidacta, non foi valorada ata moito despois da súa morte, cando a revisión das súas reportaxes na revista "Vida Gallega" e a doazón de 127 exemplares fotográficos ao Museo de Pontevedra reveláronnos o seu traballo.
-Placeres Castellanos: profesora, enfermeira, xornalista e guerrilleira, foi a primeira muller da Agrupación Socialista de Vigo. Durante a Guerra Civil, o bando fascista fusilou ao seu marido e ao seu fillo Victor, de 19 anos. Despois de rematar a guerra, exiliouse a Francia, onde continuou a súa militancia.
-Olimpia Valencia: xinecóloga, foi a primeira licenciada galega en medicina. Detida en 37 acusados de pertenza ao Partido Galeguista, pasou anos moi duros despois da guerra cando, tildada de "vermella", moitas mulleres deixaron de ir ao seu despacho.