Luís Villares: "Se En Marea non vale para solucionar os problemas da xente, irá ao lixo"

- Como afronta este novo proceso interno?

-Temos un proceso estatutario bastante ríxido cos prazos e temos plenarios cada seis meses, así que non hai moita marxe para movelos. Con esa marxe xogaremos e será o Consello quen decida axustándose aos estatutos. Dentro diso, estamos abertos a falar.

- Vai tender pontes co sector crítico nucleado agora na chamada "mesa pola confluencia", que integran Compostela Aberta, Anova, EU, Marea Atlántica, Ferrol en Común e Podemos, que pide máis pluralidade e dá por amortizado o mandato da dirección? Hai uns días dicía vostede que a xente cansa deste cruce de críticas internas.

-Como cidadán sempre me daba moita rabia que a xente na que confiaras despois se criticase entre eles publicamente. Entendo a crítica pública se non hai lugar a nivel interno, pero, habéndoo, todas as achegas deben de reconducirse aí. Á cidadanía non lle interesa esta cuestión, senón a mensaxe de que podemos formar una alternativa ilusionante e seria.

- Desde a creación de En Marea cre que se transmitiu a imaxe dun proxecto serio e compacto?

-Aglutinar nun proxecto sensibilidades diferentes leva o seu tempo. Estamos facéndoo razonablemente ben dentro do pouco tempo que levamos. E a xente así nos avalou coa confianza electoral. Hai unha idea básica: poñernos dacordo no que lle interesa á xente, no que de verdade importa. Niso estamos sendo exitosos. Non vexo nin una diferenza substancial entre os que estamos xuntos que xustificase andar por separado ou cuestionándoos uns aos outros.

- Pero non houbo achegamentos entre a súa dirección e os críticos, ademais de misturarse nese conflito feridas persoais pasadas. Que pode facer para reconducilo?

-Aportar una visión cidadá. Non me importan nada as feridas pasadas, impórtame o futuro. Dígoo como cidadán: se En Marea me vale para solucionar os meus problemas, ben; se non, ao lixo (sorrí). Iso é o que di a xente e o que lle interesa. Temos espazos para arranxar problemas? Agora si, antes non. Arranxémolos.

- Que lle interesa á xente?

-Acaba de morrer unha persoa no PAC da Estrada por falta de médico. É dramático. En Galicia está a morrer xente nos hospitais por falta de médicos. É así.

- Iso lembra á frase de Beiras de que os recortes do PP mataban máis co terrorismo.

-Claro. Cinco anos despois vemos dous directivos do Sergas investigados por homicidio imprudente, por deixar morrer a xente cando había medicamentos nas farmacias. E agora estamos falando dunha persoa que morre por falta de médico. E quen é o responsable dos recortes? Núñez Feijóo.

- É culpable desa morte?

-É cómplice por non dispor os medios para que no pase. E Feijóo non deu explicacións porque é o responsable político. E tamén sufrimos unha carencia severa de servizos de pediatría. Ten que haber unha desgraza para cambialo?

- Os choques internos en En Marea poden botar para atrás a votantes que compartan esa visión?

-A xente quere votar unha opción como a nosa e laméntanse de que non nos preocupemos máis deles. Por iso, a miña misión é tratar de reconducir calquera achega interna e deixar o espazo público para as propostas.

- Optará a renovar o seu cargo de voceiro de En Marea?

-Farei o que a organización me pida. Se son útil na voceiría, pois na voceiría.

- Quere facelo?

-Teño ilusión e ánimo para seguir.

- E vai ser candidato a presidir a Xunta no 2020?

-Decidirano os inscritos (ri).

- Cre que o será Feijóo?

-Gustaríame. Gustaríame que a cidadanía puidese derrotalo nas urnas. Alegreime cando tivo que renunciar á carreira sucesoria [no PP estatal], seguramente pola chantaxe de Soraya [Sáenz de Santamaría], porque é bo para os galegos poder derrotalo democraticamente. Deséxolle a mesma fin que a Fraga.