Morre aos 71 anos o escritor vigués Alfonso Álvarez Cáccamo

O escritor vigués Alfonso Álvarez Cáccamo, nado o 23 de outubro de 1952, faleceu nas últimas horas no hospital Álvaro Cunqueiro, onde levaba unhas semanas ingresado. O autor e docente tiña 71 anos e contaba cunha profusa obra publicada.

O diario Nós adiantou a nova esta tarde, e o seu irmán Celso confirmouna na súa conta de X. "Obrigado de antemán a quen queirades manifestar a vosa dor e apoio. Desculparedes que non responda individualmente as vosas mensaxes. Un abrazo", escribiu o tamén escritor e sociolingüista. En 2018 falecera outra das súas irmás, a artista Berta Álvarez Cáccamo.

Alfonso, que colaborou con FARO e durante 35 anos foi profesor no colexio de Panxón, deixa atrás unha longa traxectoria literaria. Foi galardoado con numerosos recoñecementos, como o Premio de Novela Café de Catro a Catro en 1988 por Peito de vimbio; o Xerais de novela en 1990 por As baleas de Eduardo Reinoso, o Álvaro Cunqueiro de Narrativa en 1993 por Xente de mala morte ou o Manuel García Barros de novela en 1996 por O espírito de Broustenac.