FARO lanza os II Premios Emilia Pardo Bazán no País das Rías
En colaboración coa Deputación de Pontevedra, galardoará a tres figuras destacadas do Feminismo, o Turismo e a Cultura nas Rías Baixas
![As premiadas da I Edición: Lorena Varela, xerente da Ruta do Viño, a escritora Marilar Aleixandre e Priscila Retamozo, Técnica en Igualdade.](https://estaticos-cdn.prensaiberica.es/clip/ca21fb91-110d-4709-bdf9-09e72c476645_16-9-discover-aspect-ratio_default_0.jpg)
As premiadas da I Edición: Lorena Varela, xerente da Ruta do Viño, a escritora Marilar Aleixandre e Priscila Retamozo, Técnica en Igualdade. / José Lores
Emilia Pardo Bazán é unha das personaxes galegas que máis impactaron na identidade do país, recordada pola súa forte personalidade, o seu compromiso radical coas mulleres e, por suposto, a súa valía e prestixio literarios.
Para seguir mantendo viva esa tripla bandeira de Emilia Pardo Bazán como icona do feminismo, precursora do turismo nas Rías Baixas e valor universal das Artes e as Letras, FARO de VIGO, xunto a Deputación de Pontevedra, celebra unha nova edición dos Premios Emilia Pardo Bazán no País das Rías, que se concederán en tres categorías a figuras destacadas da nosa provincia.
Unha iniciativa coa que FARO e a Deputación de Pontevedra poñen en valor a figura dunha das literatas máis emblemáticas da historia da comunidade galega ao tempo que recoñecen o liderado de mulleres que hoxe en día seguen a estela dos seus valores, especialmente naqueles eidos que Pardo Bazán esbozou como potenciais do “país das rías”, tal e como a escritora designou de maneira maxistral á provincia de Pontevedra.
Esta segunda edición repite tras o éxito colleitado o ano pasado, celebrada no abrigo do centenario do falecemento da escritora, e que contou cunha alta participación. Nos Primeiros Premios Emilia Pardo Bazán no País das Rías foron premiadas Lorena Varela, xerente da Ruta do Viño Rías Baixas - na categoría de Turismo-, Marilar Aleixandre, escritora - na categoría de Cultura-, e Priscila Retamozo, Técnica de Igualdade de Xénero - na categoría de feminismo-.
Os vencedores serán anunciados durante unha gala que terá lugar na sede de AFundación o vindeiro 14 de decembro
Para edición actual, as candidaturas xa poden ser presentadas tanto polos membros do xurado como polos lectores do FARO DE VIGO a través do formulario habilitado na súa páxina web ou do correo pardobazannopaisdasrias@farodevigo.es, sempre antes do día 4 de decembro (incluido).
Serán valoradas no fallo do xurado, que nesta ocasión celebraráse entre o 5 e o 8 de decembro. Este estará composto alo menos por dous representantes da Deputación, dous representantes de FARO e tres membros externos.
Tras a reunión dos expertos, os finalistas de cada categoría serán anunciados/as nas páxinas deste xornal, mentres que os vencedores ou vencendoras, pola súa banda, serán revelados na Gala dos II Premios Emilia Pardo Bazán no País das Rías, que terá lugar o vindeiro día 14 de decembro na Sede de Afundación, en presenza de finalistas, autoridades e convidados dos diferentes ámbitos sociais: cultural, feminista, turístico, etc.
Coa instauración destes premios, FARO pretende servir de guía para mostrar esa Galicia aliñada tras o feminismo, a cultura e o turismo sostible, ademáis de contribuír a que a figura de Emilia Pardo Bazán sexa percibida pola sociedade en todo o seu potencial, divulgando os seus valores no noso territorio.
![Emilia Pardo Bazán e Concepción Arenal participaron na entrega de premios do ano pasado da man das actrices da Escola Superior de Arte Dramático.](https://estaticos-cdn.prensaiberica.es/clip/b23f528f-39e4-420c-a450-dbca2f4b0c41_alta-libre-aspect-ratio_default_0.jpg)
Emilia Pardo Bazán e Concepción Arenal participaron na entrega de premios do ano pasado da man das actrices da Escola Superior de Arte Dramático. / José Lores
Os lectores de Faro de Vigo xa poden presentar a candidatura
Segundo as bases do certame, poderán ser candidatos/as aos premios Emilia Pardo Bazán no País das Rías calquera persoa ou entidade que reúna os requisitos necesarios en calquera das categorías establecidas:
Feminismo
O galardón recaería naquela figura merecedora do mesmo pola súa traxectoria, méritos e valores, contribuíndo así a unha sociedade mellor, impulsando co seu exemplo a igualdade entre homes e mulleres, así coma poñendo en valor o liderato femenino en sectores menos representados.
Turismo
O premio pretende recoñecer emprendedoras e emprendedores cun papel destacado na proxección turística do País das Rías (empresa, sector hostaleiro, enoturismo, agroturismo, turismo náutico, roteiros de marisqueo, turismo rural, blogueiras e influencers…) tratando de apoiar os novos formatos turísticos.
Cultura
Na categoría de Cultura, o Premio pretende recoñecer as traxectorias culturais máis relevantes do País das Rías, e ao mesmo tempo enxalzar os novos valores literarios, artísticos e escénicos en todas as súas variantes… literatura, música, pintura, etc.
Deste xeito, as candidaturas poderán ser presentadas tanto polos membros do xurado como polos lectores de Faro de Vigo a través do formulario habilitado na páxina web do periódico ou cun correo a pardobazannopaisdasrias@farodevigo.es
Todas elas serán valoradas polo xurado designado e deberán ser remitidas antes do día 3 de decembro.
Xa podes presentar as túas candidaturas aquí!
- Máxima alerta de la Policía Nacional por el mensaje que está llegando a los móviles de miles de personas
- Una belleza de armas tomar
- Un nutricionista desvela qué es lo primero que le quita a los pacientes que quieren adelgazar
- Uno de los dos tripulantes gallegos desaparecidos sobrevivió al secuestro del atunero Alakrana del 2009
- El abandono no entiende de razas ni de dinero: mascotas que valen miles de euros llegan a A Madroa
- Condenan a dos años y medio de prisión al maquinista del Alvia y al exdirector de Seguridad de ADIF por el accidente de Angrois
- La familia del vigués que murió tras el concierto de Karol G anuncia denuncia: 'No hubo forcejeo ni pelea
- Mujer de más de 45 y sola busca ayuda