Luar Na Lubre, unha das bandas de referencia da música folk galega, pecha a xira galega do seu disco dedicado á Ribeira Sacra no Teatro Afundación de Vigo este sábado (20.30 horas, entradas desde 19 euros). A banda liderada por Bieito Romero vén de dar concertos por Europa -Reino Unido, Francia e Bélxica- e recibir un gran respaldo de público de América Latina. Aínda lle quedan outros 40 directos por dar, segundo recoñece vía telefónica desde Barcelona o líder da formación, Bieito Romero.
-Disque máis de 5.000 persoas lles viron en América Latina?
-A xira por América foi unha gran sorpresa para nós. Moi intensa. Non era a primeira vez que iamos a Santiago de Chile ou a Córdoba (Arxentina) ou a Montevideo, pero o reencontro foi fantástico. Sobre todo, porque presentabamos un traballo tan conceptual como "Ribeira Sacra", que daba a sensación de que fóra de Galicia era difícil de explicar. Pero nos levamos a sorpresa de que as historias sorprenden e a música gusta moito. Levamos corenta concertos feitos e estamos enchendo teatros por España e tamén por Europa. Restan agora outros corenta, que tamén están tirando moi ben.
-Levarán castañas e mencía da colleita da Ribeira Sacra para manter as forzas...
-Eu como tantas castañas no tempo das castañas, que o resto do ano o meu ADN ten parte delas. A miña familia vén de alí. O meu pai é do concello de Esgos, dunha aldeíña moi bonita que se chama Melón Baixo, que é onde está o Mosteiro de San Pedro de Rocas.
-Precisamente, onde gravaron este traballo.
-De alí saíu o xerme do disco; as estruturas das cancións que posteriormente se gravaron. E a miña nai é de Niñodaguia, un pobo alfareiro dos máis importantes de Galicia, en Xunqueira de Espadañedo, tamén en Ourense.
-Ese foi célebre pola súa tradución no franquismo: 'El nido de la guía'.
-Alí nunca lle chamaron así nin houbo ningún cartel que o puxera; pero hai tres Niñodaguia. E meu avó, antes de afiador, foi alfareiro.
-Logo tamén hai parte de reecontro coas raíces.
-A idea inicial era facer un traballo completo sobre a Ribeira Sacra, pero a de Ourense é tan extensa, que nos quedou pendente a de Lugo... Xa o explicamos no concerto que demos alí.
-No disco mestúrase a música co ambiente; co texto en barallete (xerga dos afiadores) ou coa lenda de Romasanta. Fixeron unha banda sonora humana e natural?
-Efectivamente, hai unha Ribeira Sacra humana que está en interacción coa parte natural. Quixemos coñecer máis a figura dos afiadores, oleiros... e ao mesmo tempo, a parte histórica e lendaria.
-Entre os 26 cortes do disco, hai gravacións de campo: campás, o alampar do lume...
-Si. Ese son de ambiente ponte en situación, no ambiente do tema que vai soar inmediatamente.
-Que opinións lles trasladan os seus seguidores?
-As sensacións son boas. Non so é que vendas máis ou menos, senón que o disco ten unha parte innovadora e as informacións que nos chegan é que gustou. Foi un camiño que continuaremos porque sen dúbida, funcionou ben.
- A Ribeira Sacra acaba de obter a catalogación BIC da Xunta. Este disco foi un bo baluarte para a campaña á Patrimonio Mundial da UNESCO...
-Emocionalmente, para min sempre foi Patrimonio da humanidade, non teñen que declaralo; pero é importante que a UNESCO o conceda. Cando comezamos o traballo non sabiamos nada dese proxecto, pero cremos que en boa medida axuda á candidatura, a ter unha banda sonora do territorio. Non había nada musicalmente falando deste tipo; cremos que é a primeira vez que se fai un traballo destas características, que é unha achega interesante para ese Patrimonio da humanidade. E tamén, que podería ser perfectamente unha provincia propia dentro de Galicia.
-Tiveron moitas e moi eclécticas colaboracións no disco. Estarán no concerto?
-Case todos os que participaron no disco van estar e haberá moitas sorpresas. O concerto de Vigo vai ser un concerto especial; é o último da xira por Galicia. Estarán SES, Óscar Rosende, pasando pola Coral de Ruada, Astarot,os 'Felos' de Maceda, facendo unha representación do Entroido, un afiador... Pretendemos que sexa unha festa; está asegurada. Facer unha xira por teatros en Galicia, onde non hai moito costume de pagar polo noso, é moi importante. E en Vigo sempre se nos quixo moito.