Dentro do marco da ficción pero nos límites conectados coa realidade e, especialmente, coas vivencias da sociedade actual e os seus problemas, móvense as tres novelas laureadas polos Premios Xerais deste ano, que cumpren 33 anos. Na histórica Illa de San Simón, un exercicio máis, foron entregados onte os galardóns nun serán no que se desvelaron os nomes dos gañadores: o vigués Manuel Esteban Domínguez, a baionesa (de Sabarís) Iria Misa Peralba e o coruñés David Pérez Iglesias. Só este último, dos tres, contaba con obras publicadas anteriormente. Entre os tres, recibirán 30.000 euros en metálico, dez mil por cabeza.

Esteban Domínguez -médico e coñecido por ser vicepresidente durante case unha década da asociación Down Vigo- conseguía o Xerais de Novela pola súa obra A ira dos mansos onde emprega a novela negra para criticar a hipocresía social coa que se trata ás personas con discapacidade intelectual ou con diversidade funcional, partindo da aparición do cadáver dunha nena nun histórico edificio de Vigo que será pescudado por un inspector de policía. "Non son consciente do Premio; nin sequera estou na fase de alegría, inda estou na de shock, impactado", comentaba a este xornal na tardiña de onte.

Pola súa banda, a nigranesa Iria Misa Peralba, licenciada en Filoloxía Inglesa e profesora de ensino secundario, conseguía o Jules Verne de Literatura Xuvenil con Xa non estou aquí, un título que narra a desaparición dunha adolescente que se foi afastando da familia e amigos para busca-la aceptación dunha tribu urbana e os relatos dos seus coñecidos reconstruíndo os seus últimos tempos e sentimentos con vida.

Por último, David Pérez Iglesias -profesor, escritor e guionista ("Retornos")- fíxose co Merlín de Literatura Infantil con Todo o tempo do mundo no que retrata como unha nena preadolescente ten que ir vivir co seu avó á unha aldea na que el é o último habitante. O espírito urbana da pequena irá adquirindo o saber do maior e do lugar.

Nesta edición, estas tres obras venceron entre un total de 89 presentadas.No acto de entrega dos premios, Ledicia Costas pronunciou o seu discurso "Todas as constelacións do mundo", adicado á Xeración Lamote "por abrir o camiño da esperanza" á poboación lectora cativa.