O Concello de Lalín iniciou onte a promoción da 51ª Feira do Cocido de Lalín na Praza de Abastos de Pontevedra, nunha iniciativa que ao longo das vindeiras semanas se achegará aos mercados doutras cidades e vilas galegas e que está patrocinado por Gadis, Abanca e Coren. No acto de presentación participaron o alcalde, Rafael Cuíña, e mailos concelleiros de Turismo de Lalín e Pontevedra, Francisco Vilariño e Anabel Gulías. Como cociñeiro estivo Alberto González, de Casa Currás, que elaborou 200 tapas da súa receita Churribóndiga, baseada no prato estrela de Lalín.
O acto, que deu comezo ao percorrido promocional do Cocido polas principais prazas de abastos de Galicia, foi "un éxito absoluto a todos os niveis e demostra que esta novidosa iniciativa que substituiu ao bus do cocido foi un acerto", valoran os representantes do goberno local. Ao longo da mañá foron centos os pontevedreses e os turistas que se achegaron ao escenario da promoción a solicitar información sobre Lalín e sobre a feira, así como a degustar as tapas que se serviron ao público.
Gulías, Vilariño e Cuíña coincidiron en sinalar a boa sintonía existente entre os concellos de Lalín e Pontevedra, factor, entre outros, determinante para dar inicio aos actos de promoción nesta cidade. Os representantes municipais destacaron a fortaleza do Cocido como elemento de atracción de visitantes e prato que serve para situar a Lalín no mapa. Tamén fixeron fincapé en que a feira, que este ano se celebra o 24 de febreiro, é "a festa gastronómica máis importante do inverno", motivo polo que dende o goberno municipal se vén realizando "un esforzo moi importante na súa difusión" co obxecto de conseguir que un ano máis se supere o récord de cocidos servidos nos restaurantes de Lalín. Finalmente, convidaron a todos os veciños de Pontevedra a visitar Lalín durante o Mes do Cocido, xa en marcha ata o 14 de febreiro, e a acudir ao día grande. A promoción deste ano consistirá na realización dun percorrido por seis das principais e máis coñecidas prazas de abastos.
