Pouco a pouco, as prazas, xardíns rotondas e rúas das principais cidades galegas vanse enchendo de esculturas. A pesares do elevado volume económico que representan estas prácticas, case nunca se sacan a concurso público. Os alcaldes e grupos de goberno municipais, exercen de expertos de arte, mecenas ou xuíces, para decidir as pezas e os autores elixidos. Manuel Buciños, un dos artistas maiores do país, mostra a súa discrepancia, ó estar a favor de que as adxudicacións se fagan “mediante concursos públicos”.
- Vostede fai poucas exposicións, coma que ofrece agora no Centro Cultural da Deputación.
- Porque non consigo xuntar obra. Teño moitos encargos, e hai cousas que rexeito.
- Diga unha das que se negou a facer.
- Negueime a facer o coche dedicado ó rallye, que me parece un horror. A persoa que mo encargou, tiña a idea clara e quería que fose iso: un coche realista, con dous tíos sentados no faro. A min hoxe non me poden obrigar a facer iso, porque me vou defendendo.
- Moita xente que visita Ourense, fotográfase diante desa escultura.
- Esa escultura é unha vergoña para a cidade; é unha falla, que había que colocar en Valencia. Eu lévome ben con Ramón Conde, pero iso non é nada. Esa peza é a vergoña dun escultor. Eu tiña unha conta no Banco Pastor, e cambieina por non pasar por alí.
- ¿Gústanlle máis as gordas de Ramón Conde?
- As gordas son outra cousa, por deus, están moito mellor.
- Tampouco está de acordo coa colocación da escultura dos Ramóns: Ramón Cabanillas e Ramón del Valle Inclán.
- Non é que esa escultura estea mal; está fóra de sitio. E tamén está fora de sitio a do coche, pero esa era mellor que a levaran a un recanto onde non se vira moito.
- Ourense fixo grandes achegas, no campo da escultura.
- Faílde tiña un oficio marabilloso, que entronca coa tradición da escultura galega. No ámbito galego, o Mestre Mateo é o máximo do Románico. E Asorey foi un gran escultor. Ten pezas marabillosas. O busto de Curros Enríquez de Celanova ten unha forza tremenda. En cambio no monumento que hai diante da Subdelegación do Goberno, fixo un anxo como puido.
- ¿Móstrase partidario de retirar ese monumento?
- Eu creo que aí non pinta nada. Pero para quitar esa escultura, había que retirar antes outras.
- ¿Cales son as esculturas do feísmo en Ourense?
- Hai moitas. As cousas que están fora de lugar, aínda que sexan boas, contribúen ó feísmo. Eu sacaría o coche que está onda a Subdelegación do Goberno, a que tiñan onda a Ponte Vella, diante dos Salesianos, e as esculturas que colocaron nas rotondas da Ponte do Milenio.
- ¿Os políticos fallan nalgunhas ocasións, cando se poñen a xestionar a arte?
- As esculturas deben adxudicarse por concurso público.
- ¿Ese é un problema que se dá en toda Galicia ou só en Ourense?
- En toda Galicia. Eu hai moito tempo que non vou ós concursos, porque non os convocan.
-¿Vostede tardou moito tempo en lograr un recoñecemento sólido en Ourense, dende que chegou de Madrid?
- Eu sentinme sempre moi querido en Ourense, pero de quen vivín realmente foi de Vigo. Todos os artistas deste país temos que darlle as grazas a Caixavigo. Cando ninguén mercaba nada en Galicia, Caixavigo, que tiña dúas salas, invitábate a que expuxeras, facíache o catálogo e mercábache unha peza. Pero ademais houbo unha época, nos anos 74, 75 e 76, durante a que todo o mundo que ía a Vigo esgotaba a obra. Vigo foi a cidade onde máis exposicións fixen e onde máis vendín.
-¿Cantas pezas súas ten Caixanova?
- Trinta esculturas.
- ¿Cantas obras vendeu en Vigo?
- De 200 a 300.
- ¿Como lle vai na Coruña e en Santiago?
- Cando expuxen alí, foime moi ben. Hai moito tempo que non vou. Eu expoño moi pouco.
- ¿Véndeo case todo na casa?
- Non dou xuntado obra. Teño moitos encargos.
- Nun momento determinado, houbo escultores que se moveron ben e foron colocando pezas pola meirande parte das cidades galegas, por afinidades persoais ou políticas. En cambio vostede non puxo todas as que merece.
- Eu nunca fun ofrecer obra ós despachos dos políticos. Todas as que teño por aí, foi porque me chamaron.
- En Ourense ten bastante obra.
- Teño a de Castelao, na praza da Imprenta, a de Alexandre Bóveda, na rúa da Barreira; Otero Pedrayo e Rei de Viana.
- ¿E nas demais cidades galegas?
- En Vigo teño esculturas que reproducen, a tamaño superior ó natural, as figuras de Otero Pedrayo, Valle Inclán, Saramago e Álvaro Cunqueiro. No xardín do hospital da Gran Vía hai unha maternidade da miña autoría. En Pontevedra coloquei a figura de Castelao; en Marín, un monumento ó mar, que reproduce a imaxe dunha peixeira e un pescador; nas Pontes, unha escultura do fundador da Estrella de Galicia; en Cabreiroá (Verín), Ramón y Cajal; en Rianxo, A Peixeira; en Mondariz, un monumento á auga, formado por oito rapaces collendo unhas pombas, das que saen uns chorros de auga que forman unha cúpula; na Castellana de Madrid teño o monumento ó libro: un rapaz e unha rapaza lendo un exemplar, fronte á Biblioteca Nacional. Roubaron o monumento ó emigrante que tiña na Lama. Levaron a figura da muller, que pesa 250 quilos. Tiveron que utilizar unha serra para cortala e unha grúa para levantala.
- Iso acaba aparecendo.
- A min chamoume a Garda Civil, para comunicarme que a levaran, e non souben máis nada.
- A súa casa do Pino ten terreo de abondo.
- Uns 5.000 metros, nos que se poden ver un monumento ó viño, con tres rapaces en círculo, ó lado dunhas parras con uvas, en bronce; unha maternidade grande, cun neno arriba, como homenaxe á vida; outra maternidade, coa nai de pedra e o neno de bronce; unha fonte, consistente nun neno cunha concha que bota auga; un nu e catro farois, de pedra e bronce, para iluminar.
- Todo combinado con árbores.
- Aquí hai unhas catrocentas camelias, nespereiras, cerdeiras, carballos e magnolios.
- ¿Este é o seu paraíso?
- Si.
- ¿Quen lle deseñou a casa?
- Fonseca Moretón. Ten o estudio abaixo, moi cómodo, e arriba a vivenda. Estou moi contento nesta casa, na que hai moita luz, ó contar con fiestras xigantescas.
- ¿Pensa montar aquí o forno?
- Sigo tendo o forno na Barrela, porque é unha cousa bastante sucia, moi complicada. Cando teño que fundir, vou para alí unha semana e traio as pezas en anacos. Fago as obras por partes, porque máis dun metro non se pode fundir. Despois hai que soldar.
- Ourense foi a capital cultural de Galicia coa Xeración Nós.
- Foi un movemento dunha importancia, que seguramente non se dará nunca máis na historia, impulsado por Otero Pedrayo, Vicente Risco, Florentino López Cuevillas…
-Vostede, como artista, séntese debedor de todo iso.
-A Xeración Nós deixou un rescaldo aí que permanece; quedará para sempre.
- ¿Ourense é a capital das artes e das letras de Galicia?
- Eu penso que si, sen dúbida algunha. José Ángel Valente é un fenómeno. Ten unha grande transcendencia internacional como poeta.
-¿Qué lembranzas ten vostede de Eduardo Blanco Amor?
- Cando volveu de América, a pesar de que era un personaxe moi coñecido, viña con pouco diñeiro e tivemos que botarlle unha man todos os amigos. Comía moito na miña casa. Cando tiña que ir a algún sitio de viaxe, eu brindábame a levalo. E aportamos obras moitos artistas para que sacara fondos, cunha exposición que se fixo en Caixavigo. Case esgotou as pezas.
- ¿Tivo momentos difíciles?
-Pasouno mal. Que un home da súa talla, tivera que estar esperando que o invitaras a comer, ós 65 anos, é unha cousa tremenda.
-¿Como era Blanco Amor?
-Era un home moi tenro, moi boa persoa, respectuoso e tiña un chisquiño de mala uva.
- Tiña o seu orgullo.
- Eu chamáballe “Camelo”, porque tiña esa cousa de ir mirando para diante coma os camelos.
- Tratou a Celso Emilio.
-Era encantador. Viña comer á casa, coa súa muller, Moraima.