Olaia Maneiro, Sabela Maneiro e Aida Tarrío son as tres integrantes do grupo musical que tocará hoxe no Festival Intercéltico. A naturalidade e espontaneidade son dous dos calificativos, que segundo elas, definen a Tanxugueiras. A agrupación de música galega leva uns anos compartindo o seu talento có resto do mundo, partipando en numerosos festivais. O ano pasado o seu disco foi galardoado polos premios MIN.
-Como xurdiu o seu grupo Tanxugueiras?
-Xorde de festa, coma todas as cousas boas. Montamos o grupo para tocar nas foliadas e ata o día de hoxe.
-Cal é o papel de cada unha das integrantes dentro da agrupación musical?
-Non hai papeis definidos, as tres creamos as pezas, arranxamos, producimos? Todo está consensuado e ningunha fai nada sen o consentimento de todas.
-A súa proposta musical é definida cunha infinidade de calificactivos pero, como a definen vostedes?
-Transgresora, empoderada, dinámica e, sobre todo, é unha proposta sen medos nin complexos pola nosa cultura e o noso idioma, o galego.
-Ata o momento, só hai un disco publicado. Hai plans para sacar á luz outro álbum a corto prazo?
-Estamos a traballar no que vai a ser o noso segundo disco. Cremos que vai a ser unha proposta arriscada, onde produciremos, arranxaremos e crearemos pezas novas. Vai a ser un traballo onde as percusións tradicionais e os nosos cantos serán o máis importante, adaptándonos claramente á música dos nosos tempos. Temos pensado presentalo en novembro e a verdade é un proxecto que nos motiva moito.
-Despois do Intercéltico, teñen previsto tocar noutros festivais?
-Polo momento temos confirmadas tres actuacións en festivais. O día 3 de agosto estaremos en Zas, o día 9 no Festival Internacional de Edimburgo e o 24 en Guísamo. O resto de citas aínda non as podemos confirmar. A medida que iamos concretando informaremos sobre elas.
-Dende a súa perspectiva como profesionais, pensan que a música tradicional galega está estendida na sociedade?
-Cremos que o pilar fundamental da música tradicional é o idioma, se o coidamos nos medios é moito mais fácil estender a nosa música na sociedade. De momento aínda hai moito traballo que facer, pero estamos vendo que cada vez chegamos a máis xente coa nosa música. Pero necesitamos un maior apoio das institucións e medios de comunicación.
-Como cren que é público que se achega á súa música?
-O noso público é moi variado, temos de todas as idades. A verdade e que temos moita sorte de que nos escoiten incluso xente que nunca se interesou pola música tradicional. Cremos que a clave está en darlle un toque dos nosos tempo a música tradicional.
-Que lles parece o cartel que logrou xuntar o Intercéltico para esta edición?
-Parécenos que hai grandes propostas e sobre todo encántanos enriquecernos de músicas doutros países.
-Este ano o festival musical conta cunha alta participación de grupos conformados unicamente por mulleres (catro de seis). Que lles parece este aumento da presenza feminina?
-Parécenos estupendo que se de visibilidade a grupos de mulleres e deixar claro que hai mulleres instrumentistas, produtoras, cantantes, percusionistas?A música non ten nada que ver có xénero, e moitas veces polo simple feito de ser muller xa se cre que é menos profesional. Festivais coma este dan visibilidade e oxalá moitos aprenderan. Desexamos que algún día este tipo de cousas deixen de ser noticia, porque iso significaría que estamos moi cerca de acadar a igualdade de verdade.