A veterana compañía teatral Chévere será a encargada de levantar o pano o mércores 14 de xullo co espectáculo As fillas bravas e o mito de Casandra.
Unha obra na que, dunha banda, tres mulleres maiores tratan de entender o cambio climático e facerlle fronte aplicando os saberes e a experiencia dunha vida longa no rural e, por outra, é unha obra con perspectiva de xénero á procura de personaxes femininas empoderadas, colocando o foco nunha muller afirmativa, autónoma, creativa e implicada na colectividade.
CON VOZ DE MULLER
Aínda que a programación de verán O son da rúa inclúe de forma transversal o enfoque de xénero de xeito que as mulleres artistas están presentes en todos os programas que se inclúen, tamén dedica un ciclo exclusivamente á visibilización da figura da muller nas artes escénicas e na música galegas.
Con esta filosofía chega Con voz de muller á praza da Ferraría os días 14,15, 16, 17 e 18 de xullo, en sesións que comezan ás 22:00 horas e que inclúen dúas representacións teatrais e tres concentos.
O mércores 14 de xullo, Chévere representará o espectáculo As fillas bravas e o mito de Casandra e o xoves 15 a compañía A Panadaría porá en escena a obra Elisa e Marcela.
Na fin de semana será a quenda da música e será a banda Tanxugueiras a que suba ao escenario da Ferraría o venres 16, seguida de Amparanoia o sábado 17 e pechará o ciclo Uxía o domingo 18.
Todas as sesións, ao igual que todas as actividades de O son da rúa, terán lugar na área aforada da praza e na que é de obrigado cumprimento as normas de seguridade vixentes por mor da actual situación sanitaria.