Como funcionan os motores, en que consisten as ilusións ópticas ou como se produce o magnetismo son algunhas das cuestións ás que tenta dar resposta o Museo Científico Itinerante que acolleu o CEIP Escultor Acuña de Vigo, nunha actividade organizada pola ANPA do centro.
Sorpresa, incredulidade ou estrañeza foron algunhas das primeiras impresións mostradas polos escolares de 5º e 6º de Primaria que tiveron a oportunidade de escoitar as explicacións dos monitores e impulsores deste proxecto interactivo, pero tamén de experimentar directamente coas leis da física. Precisamente espertar a curiosidade e aprender experimentando son os obxectivos fundamentais da iniciativa posta en marcha por dous enxeñeiros industriais de Gondomar que tentan facer accesible o coñecemento científico. E para isto utilizan uns 80 obxectos, distribuídos en seis mesas temáticas, que lles permiten mostrar de forma sinxela como a ciencia está presente en cada faceta da vida cotiá.
