Na ESO, os xoves son 
os novos venres!

Non hai tanto que na materia de tecnoloxía nin sequera se falaba de ordenadores, adicábamos o tempo a montar aparellos de madeira. 

Hoxe, engadido o apelido “dixital”, son moitos os alumnos e alumnas que antes de rematar a ESO xa saben programar placas bases ou artellar circuítos eléctricos. 

Pasamos de xogarnos a vida dos compañeiros coas pistolas de silicona a correr o risco de pasarnos de potencia e volver tolos aos robots do aula. 

Sempre haberá anécdotas, iso non cambia, pero todo o demais si; e faino cada vez máis rápido. 

“Nos tempos nos que vivimos, o alumnado precisa familiarizarse coa programación cunha visión multidisciplinar”, di Alberto Gómez - Naveira, que engade: “Ao fin e o cabo, falamos de pensamento computacional, que non é outra cousa que seguir unha serie de pasos lóxicos para chegar a un obxectivo”. 

Graduado en Ciencias do Mar e máster en Robótica e programación aplicada ao aula, o mestre de 27 anos imparte Tecnoloxía e Matemáticas nas aulas da ESO do Colexio Apóstol, onde están a piques de despedir o seu primeiro curso con “Venres en Proxectos”. 

Nesta pioneira iniciativa, como na vida, as asignaturas non se conciben como entes aillados, senón que precisan unhas de outras para poder avanzar. Por iso, o venres de cada semana, o alumnado xúntase no espazo conxunto do taller para recibir a docencia de tres profesores, á súa vez ao fronte de tres materias distintas. 

O traballo organízase a través de dous proxectos interdisciplinares por trimestre: un de sociais (que aglutina Historia, Lengua e Lingua) e outro de ciencias (con Bioloxía, Tecnoloxía e Educación Plástica), cada un coa súa respectiva temática. 

Unha iniciativa non exenta de retos, pero que está a superar expectativas no seu primeiro ano de implantación e que serve para ilustrar tanto a chegada da Lomloe ás aulas como as posibilidades que ofrece a aprendizaxe competencial e interdisciplinar máis alá de Infantil e Primaria. 

Como a vida mesma

“Nunca traballara desta forma. Cando se propuxo, pareceume moi boa idea, pero tamén moi valente”, conta Gómez-Naveira, que forma parte do grupo de ciencias —xunto as profesoras Paloma Calvo, Cristina Barriga, Noelia Carballeda e Irene Valverde—, do que xurdiron ideas ben interesantes que mesmo levaron dous premios na segunda edición do festival científico ao aire libro de Vigo ‘CinVigo. Ciencia na rúa’, celebrado o pasado abril. 

La ciencia, ganadora moral del festival “CinVigo”

Unha aposta que achega ao alumando a situacións máis próximas ao seu futuro persoal e laboral e que pon todos os coñecementos adquiridos ao servizo dun mesmo obxectivo, fomentando tamén a superación das dificultades, a xestión da frustración ou o traballo en equipo. 

O (cada vez menos) asombroso é que a mesma metodoloxía coa que aprenden “non só máis, senón tamén mellor” é tamén coa que mellor o pasan: “Están todo o tempo traballando de forma manipulativa, pasáselles voando; de feito, moitas veces preguntan: Pero xa é hora? Para eles, o chegar o xoves é como se fose o venres, considérano parte da súa fin de semana”. Que maior razón para apuntarse a esta metodoloxía que o xeito no que logra motivar ás adolescencias.