Trasdeza comeza a pintar o Camiño

Despois de varias sesións teóricas sobre a riqueza natural e patrimonial da Vía da Prata ao seu paso por Silleda, os catro centros educativos deste municipio realizarán varias saídas a tramos da ruta xacobea para coñecer in situ os enclaves que xa viron nas aulas. A iniciativa leva por nome Trasdeza pinta o Camiño e está promovida polo Concello de Silleda, dentro do programa O Teu Xacobeo, da Xunta de Galicia. Este proxecto autonómico financia tamén outra iniciativa no concello veciño de Vila de Cruces, que terá como protagonista á localidade de Gres.

As sesións fóra da aula foron inauguradas onte por un grupo burbulla do instituto Pintor Colmeiro. O alumnado, guiado polo persoal de Amarelas Sociedade Cooperativa, visitou varios enclaves do tramo da ruta xacobea que discorre entre Ponte Taboada e Silleda. Durante a visita, os e as estudantes contaron con material promocional e unidades didácticas creadas para esta ocasión. Durante os vindeiros días, e se as condicións meteorolóxicas o permiten, posto que esta saída xa fora aprazada polo mal tempo, as sesións ao aire libre continuarán con grupos do CEIP de Silleda, o CEIP Ramón de Valenzuela e o colexio María Inmaculada.

Ademais destas clases teóricas e prácticas sobre o patrimonio xacobeo no municipio, o estudantado tamén porá en marcha un traballo de aula en torno á comunidade de artistas pictóricos de Trasdeza. Como complemento, está prevista unha xornada de pintura ao vivo e un foro de pintura para os vindeiros meses.

O Teu Xacobeo asigna a este proxecto de Trasdeza unha subvención de 9.257 euros, segundo recolle o DOG, mentres que no caso de Vila de Cruces a aportación económica ascende a 3.847 euros. A relación de axudas saiu publicada este martes.