Antón Alonso Ríos volta dar clase
O instituto Pintor Colmeiro bautiza unha aula co nome do docente e político galeguista
Desde hai tempo, no IES Pintor Colmeiro moitas das súas aulas locen, na entrada, unha placa en lembranza dun escritor en lingua galega. Suso de Toro e Xosé Neira Vilas (que dá nome á biblioteca) son algúns deles. Pero o ano pasado decidiuse, en consenso coa Equipa de Dinamización Lingüística do centro, facerlle unha homenaxe a Antón Alonso Ríos, político agrarista e mestre que puido fuxir da represión franquista grazas a invertarse unha nova identidade, a do mendigo Siñor Afranio.
Desde onte, Alonso Ríos é o novo nome da aula do grupo C de primeiro de Secundaria. Foi outro profesor, Matías Rodríguez da Torre, quen lles explicou aos alumnos o legado político e tamén literario que deixou este silledense aos dous lados do Atlántico (emigrou aos 21 anos á Arxentina e, tras voltar a España en 1931, puido regresar a Sudamérica desde Casablanca tras fuxir ata Portugal tralo levantamento do 36). Foi, precisamente, un parente lonxano o que descubriu a placa á entrada da aula, Alberto Ríos. O seu bisavó era curman de Antón Alonso Ríos.
Desde este centro educativo xa se adianta que se seguirán bautizando máis aulas sempre coa colaboració da EDL. Non é a primeira vez que Antón Alonso Ríos (falecido en 1990), volta, de forma simbólica, ao Concello que o viu nacer. No ano 2009 na Casa de Cultura de Silleda organizouse unha mostra con 37 paneis sobre a súa vida política e literaria. A finais do ano pasado, en colaboración co IES de Tomiño, tamén se ofreceu ao público outra exposición a base de fotos, fondos bibliográficos do autor e a recreación dunha escola da II República. Ademais, os Concellos de Silleda e Tomiño xa lle propuxeron á Deputación a reedición da obra Siñor Afranio, ou cómo me rispei das gadoupas da morte.
Temas
Más en Deza-Tabeirós
-
Una manifestación exige en Pontevedra el final de la “depredación energética”
-
Las bodas abandonan el ágape tradicional, ahora se estila el cóctel con cocinas exóticas
-
Las expectativas frustradas de la (re)industrialización europea
-
Lalín abona la segunda anualidad por los terrenos de la Gran Praza: 730.000 euros