130 niños de velutina eliminados en 2023

O equipo de voluntariado destinado ao control da vespa velutina no Rosal realizou máis de 130 intervencións ao longo de 2023, actuacións fundamentais para preservar o ecosistema, a biodiversidade e a calidade de vida de rosaleiros e rosaleiras.

A alcaldesa, Ánxela Fernández Callís, destaca a importancia do seu traballo, “un labor que vai máis alá da retirada de niños destas vespas invasoras. A súa actividade é esencial para manter o equilibrio ecolóxico e para garantir a seguridade e a tranquilidade dos nosos veciños e veciñas”.

A pesar de que calquera incidencia relacionada con esta especie invasora é de competencia autonómica, dende o Goberno municipal saliéntase que os servizos ofrecidos dende a Xunta son insuficientes. Grazas á colaboración deste equipo de persoas voluntarias, o Concello pode dar resposta a calquera aparición de velutinas “para conservar así o equilibrio, a sostibilidade, a calidade de vida e a produción agrícola no Rosal”.

Agora é o momento no que están comezando a criar estas vespas e a crear os seus niños primarios, polo que é moi importante que todas as persoas que detecten un dean aviso o antes posible.