Hostaleiros e concello ultiman o “III Cocido Cañicense”

O Concello da Cañiza acollerá a vindeira fin de semana, os días 29 e 30 de outubro, a terceira edición da súa festa gastronómica do Cocido Cañicense. Un evento gastronómico promovido, impulsado e organizado conxuntamente polo concello e polos hostaleiros da localidade.

Un atractivo culinario que se suma aos seus encantos turísticos entre os que destaca a súa diversidade paisaxística e a súa accidentada orografía que se pode percorrer e gozar grazas aos sendeiros e as rutas naturais sinalizadas.

A Cañiza é terra famosa pola calidade dos seus xamóns e polos seus cocidos. Por iso e co inicio do outono, o restaurantes e máis o concello poñen en marcha esta nova edición, coincidindo coa baixada das temperaturas que é como mellor se saborea este prato único que durante décadas congregou entorno ás mesas das nosas xentes a familias e amigos.

O seu segredo está nos aires dos cumios que posúen un microclima especial para o curado dos produtos do porco. Un aire frío e seco que consegue optimizar o curado e outorgar ás carnes o mellor sabor.

Menú moi completo

Son moitos os padais que xa coñecen o cocido da capital da Paradanta e o degustan con frecuencia pero, no marco desta festa gastronómica, os hostaleiros prepararán este tradicional prato con chourizo de cebola e de carne, fuciño, rabo, orella, cacheira, lacón, touciño e costela de porco completado con pito, carne de vacún, patacas, fabas, garavanzos, cenorias e verdura ou repolo. Todo iso acompañado con pan rústico e pan de millo ou “bica” e regado por viños brancos e tintos da Denominación de Orixen Rías Baixas, tamén da Cañiza, Abelán e Eido da Fonte.

En engadido, antes ou despois do prato ofrecerase un caldo servido en tazón.A sobremesa tampouco faltará: arroz con leite ou leite frita e café. Ademáis haberá un pequeño agasallo para cada comensal.

A recomendación é reservar mesa con antelación en calquera dos restaurantes participantes.