Medio ambiente
Cañiza estrea ruta de sendeirismo
Son 7,7 km que discorren polas parroquias de Achas e Petán
![Participantes na ruta inaugural celebrada o pasado domingo. | // D. P.](https://estaticos-cdn.prensaiberica.es/clip/9121382a-20d1-4d7a-8e90-7b30abf08611_16-9-aspect-ratio_default_0.jpg)
Participantes na ruta inaugural celebrada o pasado domingo. | // D. P. / L. C.
L. C.
Por primeira vez o Concello da Cañiza consigue a homologación de rutas de sendeirismo diante da Federación Galega de Montañismo: a PR-G 206 e a PR-G 207. Foi o pasado domingo cando se inaugurou a de Fontefría (PR-G 206), incluída no Plan de Reordenación de Sendeiros da Cañiza.
Cun percorrido de 7,7 quilómetros de lonxitude, a ruta discorre polas parroquias de Achas e Petán, situando o punto de inicio no alto de Fontefría, a 790 metros de altitude, do que se parte en dirección norte. O sendeiro transcorre por unha zona chaira con pasteiros nos que se atopan varios túmulos megalíticos, coñecidas como mámoas. Continúa por camiños entre repoboacións de piñeiro silvestre con lagoas estacionais e o regato de Portapiñeiros. Nestas zonas chairas e húmidas existen varias turbeiras.
É unha das tres rutas que o Concello recuperou dentro do seu Plan de Reordenación de Sendeiros, xunto coa ruta da Cidade Castrexa das Grades e a ruta de Luneda. Unha actuación cunha inversión de máis de 30.000 euros, financiada ao cen por cen polo Plan Concellos da Deputación de Pontevedra e que ten por obxectivo poñer en valor o potencial paisaxístico da contorna, aproveitar ao máximo os recursos naturais e orientalos cara ao turismo rural de forma desestacionalizada, para impulsar a economía local.
Con estas tres iniciativas e xunto co Sendeiro do río Ribadil, pertencente ao Espazo Natural Rede Natura 2000 e a ruta PR-G 165 Sendeiro das fragas e levadas do Calvo e Deva, o Concello da Cañiza completa a súa rede de sendeiros, “axeitada a unha zona cun potencial e valor ecolóxico e natural de alto nivel”, apuntan fontes municipais.
Segundo manifestou o alcalde Luis Piña “a posta en marcha deste Plan de Reordenación de sendeiros era unha materia pendente da gobernanza da Cañiza e unha actuación prioritaria no eido medioambiental e turístico para poder aproveitar ao máximo os nosos recursos endóxenos, neste caso as nosas paisaxes, camiños e lugares con encanto, que estamos seguros serán capaces de atraer a camiñantes e turistas e que axudará a impulsar a nosa excelente oferta gastronómica e vitivinícola”.
- Máxima alerta de la Policía Nacional por el mensaje que está llegando a los móviles de miles de personas
- Una belleza de armas tomar
- Un nutricionista desvela qué es lo primero que le quita a los pacientes que quieren adelgazar
- Uno de los dos tripulantes gallegos desaparecidos sobrevivió al secuestro del atunero Alakrana del 2009
- El abandono no entiende de razas ni de dinero: mascotas que valen miles de euros llegan a A Madroa
- Condenan a dos años y medio de prisión al maquinista del Alvia y al exdirector de Seguridad de ADIF por el accidente de Angrois
- La familia del vigués que murió tras el concierto de Karol G anuncia denuncia: 'No hubo forcejeo ni pelea
- Mujer de más de 45 y sola busca ayuda