A biblioteca municipal do Porriño é das poucas en Galicia e en toda España que está presente en eFilm.online. Trátase dunha nova plataforma dixital de préstamo audiovisual que se presenta como “o mellor streaming co teu carné de biblioteca”. Acceso sen coste a máis de 12.000 películas, series, curtas, documentais, revistas, xogos e outros contidos audiovisuais a través dun dispositivo electrónica e dende calquera punto, co único requirimento de ser socio da biblioteca e ter conexión a internet.

Dende a biblioteca porriñesa sinalan que este novo servizo dixital proporciona “a mellor selección e novidades de cine galego, español, europeo, independente e clásico de todos os xéneros audiovisuais; en versións orixinais, dobradas e subtituladas, segundo o caso”.

As obras poden ser visualizadas en streaming en todo tipo de plataformas, como móbiles, tabletas, ordenadores e televisión (Smart TV, Chromecast ou conexión HDMI- HDCP)

Para usar o servizo de eFilm-O Porriño é preciso ser socio da biblioteca do Porriño, cifra que a día de hoxe acada os 7.535 carnés, entre adultos e infantil. Veciños ou non veciños da vila da Louriña, unicamente sendo socios, deben acudir de forma presencial á biblioteca e cubrir unha solicitude de uso. Posteriormente, a biblioteca proporcionará a cada solicitante os seus datos persoais para acceder á plataforma online no enderezo https://efilm.online.

Os préstamos nesta nova plataforma dixital serán independentes dos préstamos físicos na propia biblioteca (libros e DVD’s) e dos préstamos na súa plataforma de contidos dixitais GaliciaLe-eBiblio (eBooks, eRevistas e películas).

Clasificación

No catálogo de eFilm-O Porriño os audiovisuais están clasificados por cores: amarelo (a maior parte do catálogo) e negro (certos documentais, curtas, concertos, cine clásico en V.O...). Cada usuario poderá tomar en préstamo 3 audiovisuais de cor amarelo e un número ilimitado de cor negro á semana. O contador de préstamos reiníciase os luns.

Tras seleccionar a obra, a súa dispoñibilidade é inmediata, e o usuario disporá de 72 horas (48 horas nas últimas novidades) para visualizada o número de veces que se queira.

A plataforma tamén proporciona suxestións de obras en forma de listas, buscador avanzado, consulta do historial de préstamo e posibilidade de puntuar as obras audiovisuais.

Concurso de postais

A caixa de devolución do libros da biblioteca acollerá, do 13 ao 21 de decembro, ademais de libros os sobres coas postais participantes no concurso organizado con motivo do Nadal. O certame está dirixido a nenos de ata 14 anos que poderán presentar cadanseu deseño polo que logo todos recibirán un agasallo.

A postal debe partir dunha fotografía feita nun dos distintos escenarios que decorarán a vila nestas datas (Alicia no país das marabillas, Aladino e a lámpada marabillosa, As aventuras de Pinocho, Vinte mil leguas de viaxe submarina e O Mago Merlín) que logo se editará de xeito informático (e logo imprimila) ou manual facendo debuxo, incluíndo nela mensaxe de felicitación das festas.

Todas serán expostas ao público no vestíbulo do Centro Cultural do 22 de decembro ao 7 de xaneiro.