Danza contemporánea para reflexionar sobre a violencia invisible

A danza contemporánea e as letras de cancións de reguetón que hoxe escoita a mocidade foron as grandes protagonistas da performance de Ruth Balbís en Gondomar. No marco dunha nova acción do programa da Deputación Mulleres en Acción. Violencia Zero, a artista ourensá levou á Praza da Paradela “Pel continua” para invitar á mocidade a reflexionar sobre o contido de violencia machista que se agocha tras as letras destas cancións e o conseguinte perigo desta violencia invisible. A actuación foi seguida en directo por 60 estudantes da ESO do IES Auga da Laxe.

A acción escénica de Balbís consistiu nunha peza de danza contemporánea na que a artista suprimiu a melodía de temas como “Una vaina loca”, de Fuego, ou “Mirándote”, de RVFV, para extraer e analizar as súas letras ao tempo que xogaba a montar e desmontar un maniquí cos que representaba a sexualización do corpo da muller nos seus videoclips e a violencia machista presente nas súas letras.