“Que traballen moito e sexan educados e boas persoas”, di Juana Vieira, 95 anos, na súa carta. Margarita Conde, de 84, recomenda en cambio “estudar para ter un futuro mellor e formar un fogar de respecto, traballo, saúde e bos modais. Aos seus 87 anos, Luz desexa aos mozos que “teñades unha persoa que vos coide cando sexades maiores”. E Andrés, de 68, pídelle á mocidade “ensinádeme a estudar”.

Andrés, de 68 anos. | // D. P.

Estas son algunhas das verbas que unha vintena de persoas maiores de Tomiño escribiron dirixíndose aos máis novos. Trátase dunha campaña posta en marcha pola Oficina Municipal da Información Xuvenil (Omix) coa que se busca “poñer en valor a sabedoría dos seus maiores e promover na mocidade un cambio de actitude cara á mal chamada terceira idade”, sinalan fontes municipais.

Luz, de 87 anos. | // D. P.

Que sexan humildes, que aforren cartos e que se divirtan coa mascarilla, son outros dos sabios consellos que lle fan chegar á mocidade este grupo de persoas maiores, todas elas usuarias de dous centros de día de Tomiño, Centro Siempre Cuidándote, na parroquia de Sobrada e o Centro de Día do bario da Rocha.

Dende a OMIX de Tomiño, servizo dirixido á mocidade de 12 a 35 anos, din querer “facilitar información positiva sobre a xente maior, favorecendo o seu protagonismo en actividades sociais e fomentando a relación interxeracional; queremos tamén conseguir mellorar a autoimaxe dos maiores, fomentar as súas relacións sociais e a súa calidade de vida, e incluso levar á mocidade a pensar sobre a súa propia vellez”, explican desde a oficina, agradecendo especialmente a colaboración das educadoras sociais das entidades participantes.

A campaña foi pensada para difundila, sobre todo, nas redes sociais co obxectivo de promover a interrelación entre mocidade e persoas maiores institucionalizadas, cun nivel de deterioro leve ou moderado.

“É innegable que os nosos maiores creceron nun mundo que é diferente ao noso, pero existen sentimentos esenciais e universais que permanecen; por que non preguntar e escoitar aos nosos maiores? As persoas anciás son unha gran fonte de coñecemento, baseada nas experiencias vividas durante anos. A mocidade que saiba aproveitar isto, accederá a unha chea de coñecementos”, comentan os organizadores.

No proxecto participaron máis de 20 persoas maiores que escribiron frases dirixidas á mocidade, con recomendacións, suxestións e consellos para aproveitar máis e mellor a vida que se resumen en estudar, coidarse e desfrutar.