O Concello de Nigrán financiará a terapia canina do Centro de Educación Especial Juan María durante todo o vindeiro curso escolar. Confirmouno o alcalde Juan González nunha visita para coñecer de preto esta metodoloxía con beneficios científicos contrastados. Deste xeito, o alumnado continuará recibindo estas sesións que estrearon este ano coa empresa especializada Yaracan tras autofinanciarse coa venda de almanaques solidarios.

Así, igual que neste curso, no próximo ,a totalidade dos 35 alumnos seguirán a participar neste programa complementario de educación asistida un día á semana en horario lectivo e en sesións individuais ou en aula atendendo ás necesidades concretas de apoio educativo. A terapia desenvolverase con catro cans e os seus respectivos técnicos especialistas.