A senda do río Caselas ten, tras a súa ampliación, 3.557 metros. Comeza na parroquia de Santa María, no lugar das Pontes, pasa pola parroquia de San Xurxo e o seu primeiro tramo chega ata a parroquia da Picoña, no lugar do Rubal. A 2.014 metros, a senda fai un percorrido polo parque etnográfico dos Muíños do Río Caselas. Nun segundo tramo, a senda continúa ata As Regadas, moi preto do límite co Concello de Salvaterra de Miño. Ademais, conecta coa Fonte das Carballas, cruzando a estrada Carrasqueira-Cabreira, servindo de conexión peonil coa Vila da Esfarrapada. A senda foi executada pola Confederación_Hidrográfica Miño-Sil sobre terreos de dominio público hidráulico cedidos gratuitamente por máis de 200 propietarios e propietarias.
O parque etnográfico Muíños do Río Caselas está integrado por cinco muíños que foron rehabilitados: Muíño das Covas, Muíño da Laxe ou dos Cregos, Muíños de Figueiras (un de xofre e un de gran) e Muíño de Marcial ou Fondóns. Concretamente no Muíño da Laxe rehabilitouse todo a maquinaria e está en funcionamento tras anos de abandono. Convertido nun centro de interpretación, inclúe un aula didáctica con paneis explicativos nos que se da a coñecer a riqueza destes elementos singulares do noso patrimonio vinculados ao río Caselas e tamén do conxunto dos 56 muíños catalogados en todo o Concello de Salceda.
