A defensa do galego está a encher de actividades toda a comarca, e particularmente Moaña nos últimos días. Os actos polo Día das Letras continúan. Ata algunha cara tan coñecida como o futbolista Iago Aspas se sumou á defensa do emprego do idioma propio xunto a outras 30 persoas de distintos eidos profesionais. Case todas elas son veciños do Morrazo e participan no vídeo "Vivindo en galego", onde explican a súa relación con esta lingua.
"Eu falo galego cos meus amigos e familia. Fala Galego!" declarou o dianteiro do Celta de Vigo nun vídeo gravado na súa casa. Caras coñecidas como o poeta Daniel Costas, o actor Celso Parada o artista Nelson Quinteiro ou o pianista de jazz Xan Campos defenden o emprego natural da lingua propia de Galicia xunto a profesionais doutros sectores como un adestrador de fútbol base, unha responsable do sector editorial, músicos, mariñeiros ou biólogos. Cristina Ogando, profesora madrileña; Antonia Segura, profesora de Murcia; o director de cinema italiano Simone Saibene; ou a polaca Wika Grygierzec amosan que o idioma de Rosalía non ten fronteiras e defenden, coma a alcaldesa de Moaña, as portas que abre para relacionarse co mundo lusófono.
Este vídeo das equipas de dinamización dos centros escolares da comarca foi coordinado polo IES A Paralaia e se presenta hoxe no salón de plenos de Moaña ás 20.00 horas.
Onte alumnos de todos os colexios fixeron intervencións en diferentes parques e prazas de Moaña, como o paseo Manuel María. Os alumnos das escolas de música municipal e tradicional levaron a cabo tamén un concerto conxunto en San Martiño.
