Unha cuestión de responsabilidade

02.07.2017 | 03:08
Unha cuestión de responsabilidade

O transporte de pasaxeiros acadou nas últimas semanas un protagonismo mediático inusitado que compre aproveitar para propiciar unha reflexión colectiva sobre o importante papel que desempeña este servizo público no funcionamento cotián da nosa sociedade e, en consecuencia, da necesidade de garantir a súa existencia a curto, medio e longo prazo.

O transporte público é para centos de miles de galegos a canle para acceder á sanidade, á educación, ao ocio ou ao emprego. E nun país coa dispersión xeográfica e o envellecemento demográfico de Galicia, é, ademais, unha ferramenta básica de cohesión social e un órgano vital para a supervivencia do noso rural.

O transporte público é imprescindible para Galicia, pero é tamén unha realidade ateigada de carencias, de defectos e de contradicións que debemos afrontar con valentía ou nos estaremos resignando a deixala esmorecer para sempre, condenando con iso a gran parte do noso territorio ao illamento e ao despoboamento.

As novas regras de xogo establecidas pola Unión Europea, sumadas á sentenza do Tribunal Supremo que o ano pasado anulou as prórrogas ás concesións de transporte público en Galicia, fixan en 2019 o momento da gran transformación dun sistema que hai xa décadas que recoñecemos como obsoleto, ineficaz e decadente.

Pero as renuncias das empresas a seguir prestando os servizos de autobús asociados a máis de 570 liñas a partir do próximo mes de agosto nos sitúan ante a obriga -e tamén ante a oportunidade- de anticipar esa modernización do transporte público naquelas zonas de Galicia onde máis necesario é facelo.

Esquivar esa tarefa inaprazable e substituír o debate, non xa por unha lexítima folga con motivacións fundamentalmente laborais, senón por un bloqueo da vida cidadá con intolerables vulneracións de dereitos tan básicos como o dereito á educación ou ao traballo, é unha opción equivocada, pero é, tamén, unha lamentable perda dun tempo do que non dispoñemos.

Ante o ruído xerado por un intenso cruce de declaracións e non poucas falsidades divulgadas sobre o Plan de Transporte Público, convén aclarar que a única motivación da Xunta de Galicia para impulsalo e defendelo de forma infatigable é a responsabilidade.

Responsabilidade, unha única palabra con múltiples derivadas que conforman os piares sobre os que sustenta o Plan de Transporte Público de Galicia.

Responsabilidade cos veciños de toda a provincia de Ourense, de gran parte de Lugo, do sur de Pontevedra e das zonas concretas da Coruña aos que as renuncias das empresas ás liñas de autobús abocaron a quedar sen servizos de autobús a partir do próximo 7 de agosto.

Responsabilidade cos traballadores cuxos postos de traballo están directa ou indirectamente asociados a esas liñas de autobús que a tan curto prazo van desaparecer do mapa do transporte público en Galicia e cuxo futuro laboral se presentaba certamente anubrado. Fronte a iso, presentamos un Plan que garante autobuses e, polo tanto, garante empregos, e artellamos un sólido mecanismo para garantir a estabilidade laboral dos empregados afectados, cuxos últimos termos agardamos acordar plenamente nas próximas xuntanzas coas centrais sindicais.

Responsabilidade tamén coas pequenas e medianas empresas que son predominantes no tecido empresarial galego do sector do transporte público, un negocio que a configuración actual das concesións de pasaxeiros viña facendo cada vez máis deficitario e difícil. Á preocupación do Goberno galego pola súa supervivencia responde a decisión de contratos zonais dun tamaño razoable, pero sobre todo, equilibrados e viables.

Responsabilidade cos recursos públicos, que nos obriga a aproveitar a gran oportunidade de uso social que representa a extensa rede de transporte escolar que a Administración autonómica custea con 120 millóns de euros cada ano. É o momento de acabar con esa gran contradición que supón que os veciños do rural teñan que percorrer quilómetros e quilómetros para poder acceder ao transporte público de liña mentres ve parar ante a súa casa un autobús escolar financiado por todos os galegos e con prazas vacantes. É a nosa responsabilidade facelo, sen inventar nada novo, seguindo a estela do camiño iniciado antes por comunidades como Asturias ou Castela e León, e que comezan a explorar a maioría das autonomías.

E responsabilidade, por riba de todo, cos nenos e coas súas familias. Porque o Plan deTransporte Público blinda e concede carácter absolutamente prioritario a atención das necesidades dos escolares nas liñas de uso compartido. Por iso os percorridos dos estudantes, as paradas e os tempos de viaxe se manterán inalterables, mentres se reforza a seguridade e se garante a figura do acompañante en todas as liñas, máis alá do que esixe a Lei.

Resulta doadamente comprensible a inquedanza e as resistencias que producen os cambios. Pero sería difícil de entender que un Goberno responsable se deixase vencer polo medo, apostase polo inmobilismo e, deixándose levar, condenase ao seu país a un futuro sen transporte público.

Compartir en Twitter
Compartir en Facebook

Suscriptor | Opinión

Contenido exclusivo para suscriptores digitales

Dos vigueses en Spokane

Decía un colega que el silencio y la emoción invadieron Estados Unidos, desde la Costa Este a...

 
 

JAVIER SÁNCHEZ DE DIOS

La influencia

A partir de la idea de que cada cual puede hacer de su capa un sayo siempre que se lo permitan...

 
 

JOSÉ MANUEL PONTE

La buena imagen de Trapero

Tras los trágicos sucesos de Cataluña el personaje de moda en los medios es el...

 
 

PEDRO DE SILVA

Aporofobia

Aunque han pasado casi dos décadas desde que la filósofa Adela Cortina propusiera...

 
 

DANIEL CAPÓ

La pregunta de la enfermera

La publicación de fotos de las víctimas de los atentados terroristas

 
 

TINO PERTIERRA

La tristeza del alivio

Agustín: "Las mejores respuestas llegan a veces cuando no te haces preguntas. A...

 
 
Enlaces recomendados: Premios Cine