Hai uns días a empresa ENCE facía públicos os resultados dunha suposta enquisa anual coa que a empresa pretendía coñecer a percepción que a cidadanía ten da fábrica de Lourizán.
Sen entrar nas razóns que puideron levar aos responsábeis de ENCE a non dar a coñecer os resultados obtidos en anteriores enquisas, imos tratar de explicar os que agora publican e que teñen que ver coas emisións olorosas da factoría.
De acordo co recollido nos medios de comunicación, un 53,5 % das persoas preguntadas din "non percibir nunca" cheiros que se poidan relacionar con ENCE, mentres que un 30,9 % din percibilos moi frecuentemente. E deducen os responsábeis da empresa que "a loita contra o impacto oloroso empeza a dar os seus froitos", unha conclusión a todas luces interesada e errada. Que haxa unha porcentaxe elevada de persoas que perciben a cotío os cheiros procedentes de ENCE quere dicir, sen paliativos, que en ENCE estanse a producir estes cheiros con asiduidade.
Que un 53,5 % da poboación diga non percibir eses cheiros indica que ou ben teñen un problema na pituitaria olfactiva ou ben -vaia a saber Vde. porque razón- negan percibilos. En calquera caso Pontevedra ten un problema de narices e hai que solucionalo do único xeito posíbel, eliminando ese foco cheirento que, ademais, impide o traballo no sector marisqueiro e pesqueiro na Ría e o desenvolvemento económico da comarca.
* Presidente da APDR
