A ampliación da AP-9 en Chapela

07.12.2015 | 02:48

Segundo o dicionario da RAG, en medicina, unha síndrome é un conxunto de síntomas e signos que caracterizan certos estados patolóxicos. Hai múltiples tipos de síndrome: de abstinencia, de Down, de Estocolmo... Este último coñécese desde o ano 1973 e foi así bautizado polo psiquiatra sueco Nils Bejerot, a causa da reacción e comportamento dalgúns dos reféns despois do asalto ao Banco de Crédito de Estocolmo. Durante o atraco os delincuentes foron descubertos e a policía cercou o edificio, o que provocou que os clientes fosen retidos como prisioneiros varios días. A pesar do pánico evidente, os prisioneiros foron identificándose cos secuestradores e terminaron colaborando con eles. A situación chegou a tal punto que, ao seren liberados, algúns reféns non querían separarse dos asaltantes e chegaron a bicalos e a expresarlles o seu cariño.

Isto vén a conto porque creo que moitas das nosas señorías políticas acusan una serie de comportamentos característicos de padecer a síndrome de Estocolmo. Vexamos: a parroquia de Chapela en Redondela é un núcleo de poboación de 7.600 habitantes, atravesada por dúas vías do tren, dúas estradas e unha autoestrada, o que leva provocando unha desestruturación da parroquia e un enorme impacto ambiental e territorial. Por se isto fose pouco, nestes momentos estase executando a construción de dous carrís máis da autoestrada entre Rande e Vigo (6 km, 143 millóns de euros). Persoas autorizadas teñen comparado esta obra como a de pretender encher botellas de aceite (a cidade olívica) con embude de encher bocois. Os problemas de mobilidade non se solucionan con máis autoestradas, senón, con máis transporte público. Téñolle escoitado a un sabio de 92 anos, cada vez que falamos deste asunto: "que será do mundo se se converte nunha gran autoestrada!!"

En marzo do 2013 a Corporación municipal de Redondela (PP, PSOE, BNG, AER), co alcalde á cabeza, convocaron e participaron nunha gran manifestación para esixirlle a Fomento a paralización do proxecto de ampliación da autoestrada e da Ponte de Rande que, entre outros estragos suporá a demolición dos restos do Castelo de Rande, de once casas e dun colexio público. Quince días máis tarde da celebración desta manifestación, o grupo popular do Parlamento de Galicia anunciaba a presentación de dúas iniciativas: pedirlle a Fomento que priorice a ampliación da autoestrada en Rande e a construción da autovía A-57 como alternativa á peaxe da autoestrada Vigo-Pontevedra. Pode haber algo máis contraditorio? Esta é a política do partido unido, coordinado e democrático do que nos falan a cotío. E supoñemos que por razóns da vidiña política, en febreiro deste ano 2015 o máximo representante do Concello de Redondela participaba no acto simbólico de colocación da primeira pedra da ampliación de Rande (comezan a manifestárense os primeiros síntomas da síndrome indicada).

Así as cousas, a finais do mes de outubro soubemos por Faro de Vigo da cesión ao Concello por parte da empresa concesionaria Audasa, da "Finca da Ginaria" para a construción do novo "Colexio de Igrexa", "como compensación polos prexuízos causados á parroquia". A nova é anunciada como un gran logro. Home, só faltaría que nos tirasen co colexio, para beneficio dos seus intereses, e non construísen outro. Con todo, o mobiliario e o equipamento das dependencias do novo colexio terá que pagalo a Consellaría de Educación, é dicir, nós. Chegados aquí, creo que xa se pode falar dunha patoloxía clara de Síndrome de Estocolmo.

Compartir en Twitter
Compartir en Facebook
S.P.
Lo malo del embrollo que ha montado la Xunta con la sede de la fundación...
MANUEL BRAGADO
Vigo contou cun gran teatro en 1832. Foi o que na Princesa inaugurou o rico comerciante Velázquez Moreno...
 

Calendario laboral y escolar 2016/2017

Calendario laboral 2017 en Galicia

Calendario Laboral 2017 en Galicia

Aquí tienes a tú disposición todos los días festivos en  Vigo y en Galicia , así como el Calendario escolar 2016/2017 .

 

Enlaces recomendados: Premios Cine