Desde 2005, no Museo da Bienal de Vila Nova de Cerveira están representados a maioría dos grandes creadores contemporáneos, tanto portugueses como internacionais. E ademais de ser o palco principal onde se realiza o coñecido certame artístico (a Bienal), onde se expoñen as súas obras e onde se garda o seu legado, conforma un dinámico espazo museístico cunha programación anual multidisciplinar que atrae numeroso público. A máis recente é a mostra Pure Pop Art que ata o 19 de outubro promove unha aproximación a un dos movementos máis importantes da historia da arte.
A Fundação Bienal de Arte de Cerveira ( FBAC), en colaboración coa Fundación Cum Laude, organiza esta mostra que está a ter unha grata acollida polos visitantes. En Pure Pop Art está representada a obra gráfica dalgúns dos artífices máis representativos e icónicos do movemento xurdido na década dos 50 en Londres e que alcanzou a súa madurez en Nova York nos anos 60. Joana Vasconcelos é a autora convidada polo director artístico da FBAC, Cabral Pinto, a integrar esta mostra. Súmase así a nomes coñecidos do público como Andy Warhol, Steve Kaufman, Keith Haring, Robert Indiana, Roy Lichtenstein, Pietro Psaier, Mel Ramos e Robert Rauschenberg. "Trata-se de uma coleção privada de arte gráfica da empresa MBA Grupo Incorporado que é apresentada pela primeira vez em Portugal, sendo para nós uma honra expor no Museu Bienal de Cerveira estes grandes nomes intemporais da Pop Art e esta que é uma das artistas mais conceituadas do país, a Joana Vasconcelos", dicía o presidente da FBAC, Fernando Nogueira, o día da inauguración.
A exposición convida os visitantes a embarcaren nunha amena viaxe a unha época que, a pesar do tempo transcorrido, continúa moi presente nos días de hoxe. Segundo a comisaria da exposición, a galega Ángeles Rodríguez Baliño, "presentar esta colección de pop art en Vila Nova de Cerveira é un desafío e unha responsabilidade. Unila a unha obra de Joana Vasconcelos é certificar que este movemento intemporal está máis vivo que nunca". O pop art foi un movemento que uniu a arte á produción en masa, a popularidade coa vangarda e desenvolveu un novo concepto artístico ao relacionarse intimamente coa sociedade de consumo.
As serigrafías, os carteis e as instalacións representan iconas populares da época que o público recoñece axiña. A partir de máis de 120 obras, a mostra presenta "un toque nostálxico á memoria de Marilyn e James Dean, cunha profunda admiración ao traballo de Warhol, a curiosidade da figura de Pietro Psaier e a responsabilidade social de Steve Kaufman, a exuberancia de Keith Haring, o excelente traballo de Mel Ramos, a innovación de Rauchsenberg e unha pequena mención a Robert Indiana", engade a comisaria.
A exposición conta ademais con dous vídeos cedidos polo museo nacional de arte moderna do Reino Unido, a Tate Gallery londiniense. Xa na entrada, un coche pintado fóra do común dá a benvida a unha exposición que une arte e popularidade e a súa proxección cara á sociedade de consumo. A viaxe supón un percorrido desde a década dos 50 deica o presente. "A peza central é Joana Vasconcelos. Arredor dela non podería ir ninguén que non fose Andy Warhol e o resto dos artistas membros da exposición", dicía Rodríguez Baliño durante a inauguración. Pola súa banda, Fernando Nogueira, alcalde de Vila Nova de Cerveira, expresaba que "o pop art forma parte do contexto artístico universal, e como tal, Vila Nova de Cerveira non podía pasar á beira desta corrente, sendo como é a Vila das Artes".
O Petit Gâteau no mellor museo
- En Pure Pop Art pódese ver o Petit Gâteau (2011) de Vasconcelos, pero tamén a icona de Marilyn Monroe ou as famosas latas de sopa de Warhol . Trátase dunha das obras que integra a serie "Delícias". Nesta saga as creacións preséntanse como enormes e coloridos xeados de cono, anacos de tarta ou biscoitos construídos a través da acumulación e repetición de diferentes aliñamentos de formas de plásticos - mazás, peras, mouras, arandos?-, usados para xogar na area. O xigantismo e colorido captan de inmediato a atención do público, sen deixar de adiviñar o baleiro consecuente entre os volumes. Un xogo sedutor que podería resumirse en buscar ou compensar a ausencia a través da exuberancia da aparencia. A obra exhíbese, ademais, no centro que este ano se levou o premio ao mellor museo portugués. "Uma distinção que reconhece e premeia ou enorme trabalho realizado pela Fundação Bienal de Arte de Cerveira em prol dá cultura e dás artes". Isto é o que dicía o presidente da Fundação Bienal de Arte de Cerveira e da Câmara Municipal de Vila Nova de Cerveira, Fernando Nogueira, ao coñecer a atribución do Prémio de Melhor Museu do Ano ao Museu Bienal de Cerveira. En cada edición, a Associação Portuguesa de Museologia recoñece a axentes e institucións cuxo traballo se distingue neste ámbito, tanto pola creatividade, como pola visibilidade e proxección de cada unha das entidades.
