Deteñen un individuo de 75 anos en Vigo tras ameazar cun coitelo a súa parella

Efectivos da Policía Local de Vigo detiveron un veciño da cidade, de 75 anos de idade, como presunto autor dun delito de violencia no ámbito familiar, tras ameazar cun coitelo á súa parella.

Segundo informaron as forzas de seguridade, sobre as 15.15 horas do luns unha patrulla acudiu á Avenida da Hispanidad tras ser avisada de que unha muller fora agredida pola súa parella e refuxiárase na casa duns veciños.

Xa no lugar, a vítima explicou aos axentes que acababa de manter unha "forte discusión" coa súa parella, con quen leva máis de 30 anos convivindo, e que el collera un coitelo da cociña e comezara a ameazala. Ante esta situación, a muller explicou que saíra correndo a refuxiarse no domicilio do presidente da comunidade, posto que temía que a súa parella levase a cabo a súa ameaza de morte.

Os axentes trasladáronse ao domicilio onde aconteceran os feitos e entrevistáronse coa parella desta muller, un home de 75 anos, natural de Zamora e de iniciais J.A.R.G., quen recoñeceu manter unha discusión. Así, se procedeu á detención deste individuo.

Amenazas

Por outra banda, sobre as 1.20 horas deste martes, unha patrulla da Policía Local dirixiuse á rúa Severino Cobas debido ás ameazas de morte por parte dun fillo cara aos seus pais, caso polo que abriron dilixencias.

Segundo explicaron as forzas de seguridade, a nai sinalou que dende había varios meses o seu fillo, que vive nunha casa fronte á dos pais, molestáballes e ameazaba de morte, cuestións que posteriormente corroborou o pai. Os proxenitores deste mozo intentan que o seu fillo, que consume drogas, entre nun programa de desintoxicación, pero el non colabora, segundo explicaron.

Durante o tempo que os axentes permaneceron cos pais, observaron que o fillo saía á porta da súa vivenda e comezaba a insultar á parella. Posteriormente volveu saír á porta, esta vez cun coitelo de cociña e "ameazando de morte o pai", tras o que se introduciu no domicilio e pechou con chave, precisaron as forzas de seguridade.

Por todo iso, a Policía Local efectuou dilixencias, por ameazas e danos materiais no ámbito familiar, contra o denunciado. Este resultou ser R.C.F., natural e veciño de Vigo, de 30 anos de idade.