A Cidade da Cultura de Galicia, en Santiago, converterase en novembro nun ring dialéctico a través de Asaltos!, ciclo cultural no que se convida a personalidades de dentro e fóra de Galicia vencelladas co ámbito da literatura, da divulgación cultural, da tradución e da música a converterse en púxiles da palabra. Polo Gaiás pasarán Sés, Ledicia Costas e Xurxo Souto, entre outros púxiles dialécticos.
Coordinado pola investigadora e regueifeira Alba María Rodríguez, o ciclo repartirase en catro sesións ou rings dialécticos (divulgación, tradución, oralidade e poesía) que se celebrarán os venres e sábados 9, 10, 16 e 17 de novembro con entrada de balde, previa inscrición na web cidadedacultura.gal.
Asaltos! permitirá descubrirlles in situ aos asistentes outras facianas creativas de figuras como Ledicia Costas, Premio Nacional de Literatura Infantil e Xuvenil; o cantante Xurxo Souto; e a cantautora Sés, que enche auditorios cos seus temas combativos.
