O actor Luis Tosar, que presentou en Madrid a película '18 comidas,' asegurou que vive coa esperanza de que o momento máis doce da súa carreira "aínda estea por chegar", despois de que o seu traballo 'También la lluvia' (2010) fose preseleccionado para os Oscar.
En declaracións a Europa Press, o intérprete galego sinalou que 'También la Lluvia' aínda ten "moito percorrido por diante" en Estados Unidos e que o equipo do filme estuda desprazarse ao país no próximo mes de xaneiro para proseguir coa xira promocional.
O pasado mes de setembro, a Academia de Cinema preseleccionou tres das súas películas para a carreira cara aos Oscar, a xa citada 'También la lluvia', 'Lope' (2010) e 'Celda 211' (2009), e rematou decantándose pola primeira, dirixida pola cineasta Icíar Bollaín.
Segundo Tosar, foi un "putada" desprenderse de 'Lope' e de 'Celda 211', na que asina un dos seus papeis máis impactantes, aínda que confesou que, cando se decatou de que tres dos seus traballos foran preseleccionados pola Academia, sentiu un "orgullo moi grande".
UN MENU COMPLETO
En '18 comidas' (Jorge Coira, 2010), Luis Tosar comparte cartel con actores do talle de Sergio Peris-Mencheta e Esperanza Pedreño, nunha película coral nacida da improvisación "pautada" e na que personaxes moi diversos se interrelacionan en busca da felicidade.
Segundo o director Jorge Coira, que estivo na presentación xunto a Luis Tosar e varios actores da repartición, o proxecto naceu sen un rumbo fixo, aínda que pouco a pouco o cineasta foi construíndo a estrutura dunha fita a medio camiño entre a traxedia e a comedia.
"Ao principio non sabía moi ben de que ía a película, logo quedei coa idea de ata qué punto é difícil ser feliz. As veces, é necesario pasar por todo un inferno antes de chegar a alcanzar a felicidade, ou polo menos algo que se lle pareza", precisou o autor.
UNHA HISTORIA SEN HEROICIDADES
Durante o proxecto, Jorge coira non manexou ningún referente do cinema coral de forma consciente, aínda que con posterioridade manifestou a súa "profunda admiración" pola película 'Magnolia' (Paul Thomas Anderson, 1999) e o seu interese pola obra de Robert Altman.
Na fita, a comida adquire un papel protagonista, xa sexa como capricho de luxo ou como forma de subsistencia. Ao seu arredor, vanse tecendo as historias conectadas dun conxunto de personaxes correntes que encaran sen heroicidades a súa propia traxicomedia.
Segundo o actor Víctor Clavijo, que interpreta un home incapaz de confesar a súa homosexualidade á súa familia, a ficción identifícase estreitamente coa realidade. "E máis como a vida, que non é branca ou negra. Aínda que sexa un tópico, existe unha escala de grises", dixo.
