Redrum Teatro presenta hoxe no Auditorio de Cangas "A canción do Elefante" (21.00 horas), unha representación que inicialmente ía ser en abril con Ernesto Chao como protagonista principal. Tras o pasamento do gran actor galego o encargado de tomarlle o relevo é Machi Salgado, actor afincado desde vai seis anos en Cangas.
-Hoxe vai ser como actuar na casa. Supoño que xa non se pon nervioso, pero que será especial...
-Si, si. Vai ser na casa. Será a segunda vez que actúe aquí. Xa estiven con Teatro de Ningures en "Unhas poucas picadelas".
-Incorporouse fai nada a "A canción do Elefante". Xa lle colleu o punto ao proxecto?
-Eles xa levan coa obra desde 2017, pero para min vai ser a oitava función. Xa estou adaptado.
-Na obra encarna ao Doutor Villaverde, un papel que desenvolveu Ernesto Chao ata uns meses antes de falecer este verán. Como foi darlle relevo?
-Ernesto era un mestre, así que a responsabilidade é moi grande. Continuei o seu traballo e só tiven que adaptalo un pouco a min.
-A obra xira ao redor da misteriosa desaparición do Doutor Lourenzo. Que máis nos pode adiantar da trama ou das personaxes?
-"A canción do Elefante" , como di o director Álex Sampayo, é unha matrioska teatral. O público vai estar enganchado porque o misterio non se resolve ata o último intre.
-Afirma a compañía Redrum na sipnose da obra que é un "duelo psicolóxico".
-Si. A carga existencial está moi presente. Hai diálogos que permiten coñecer a problemática que cada un vai atravesando na súa vida. Chega un momento nas conversas entre o psicólogo, o doutor Villaverde, e o paciente, Miguel, no que pouco máis e non se sabe quen é o paciente e quen o médico. A falta de amor, un fillo sen referentes paternos... todo iso vaise tratando a través da relación que se establece entre profesionais e os pacientes.
-Ten vostede un perfil moi completo e versátil: cine, televisión, teatro... cal é a súa debilidade?
-O teatro, pero é case máis un sufrimento cun gozo [risos]. O sistema teatral está collido con pinzas. Aínda que parezan poucas, nós teremos cinco funcións de "A canción do Elefante" só no mes de novembro. Agora Redrum, a compañía, ten outros espectáculos para diferentes públicos. Iso é moi bo.
-Actuou en series nacionais como "El Ministerio del tiempo" e "Fariña". Esta última foi un gran escaparate para que os actores galegos reivindicasen a súa calidade...
-Si, foi unha proba máis da calidade técnica e actoral que temos en Galicia. O 90% do equipo era galego, incluíndo ao director, o produtor... "Vivir sin permiso" tamén é outro excelente exemplo. Estase a poñer o foco nos actores e actrices galegos.
-En que máis proxectos poderemos ver a Machi Salgado?
-Fun moi afortunado de entrar en contacto con Redrum, unha sorte. Non podo dicir moito máis, pero estarei noutra montaxe con eles. Ademais, nunha serie da Televisión de Galicia.