Mulleres en acción. Violencia zero traerá este ano tres actuacións aos concellos de Lalín, Silleda e Forcarei, entre as moitas que haberá en toda a provincia. Esta iniciativa da Deputación de Pontevedra suma máis de 75 creadoras e 60 accións artísticas en espazos públicos desde 2015: performance, música, danza, teatro, poesía e grafiti, arte e experiencia como ferramenta para conseguir un mundo libre de violencias machistas.
A cuarta edición do programa comprenderá 25 novas accións participativas repartidas noutros tantos municipios da provincia ao longo de doce meses. Nas bisbarras, Marta Pérez escenificará a súa Sofía en Lalín no mes de abril; A unión é vida chegará a Silleda en maio da man da grafiteira Lidia Cao; mentras que a poesía de Estíbaliz Espinosa pasará por Forcarei en setembro con 7 constelacións que xa non son invisibles.
