Os Concellos de Rianxo e O Grove son os únicos da ría que participan na terceira edición do proxecto "Youtubeiros", co cal se fomenta o emprego do galego nas redes socais, e sobor de todo na plataforma Youtube, a través dun certame de vídeos, campañas de difusión e cursos de formación.
Tal e como se sinalou na presentación acontecida onte, con intervención do alcalde meco Xosé Cacabelos, Youtubeiros é unha iniciativa organizada polos servizos de normalización lingüística dos Concellos, entre os que tamén se atopan A Coruña, Moaña, Ourense, Ribadeo, Pontevedra e Santiago.
Tamén participan as universidades da Coruña, Santiago e Vigo e maila Deputación da Coruña. Todos eles "coa meta de consolidar a comunidade de youtubeiros e promover e darlle visibilidade ao uso do galego a través de Youtube".
6.500 euros
Hai que lembrar que ata o dagora máis de 380 persoas, con idades comprendidas entre os 18 e os 80 anos, acudiron aos cursos de formación. E tamén que ao abeiro do proxecto se produciron máis de 2.000 minutos de contido en galego en Youtube.
Outro dato chamativo é que nas dúas edicións anteriores máis de 400 persoas participaron no "Premios Youtubeiros", que desta volta aumenta o número de categorías e incrementa a súa dotación económica ao pasar dos 5.500 euros de 2018 aos 6.500 euros desta terceira convocatoria.
Pódese sinalar que ese cartos repartiranse nas categorías de "Vídeo-facermos", "Vídeo-opinarmos", "Canle" e "Vídeo-cantarmos". Esta última é "a gran novidade deste 2019, e con ela recoñecerase e incentivarase o gran talento musical que está presente en YouTube".
